GIUGBOK na sab ni Prince Joey Lee ang iyang dominasyon sa local running scene pinaagi sa pagdaog sa St. Ignatius Run 2019 men’s 21K event sa SM City Cebu parking area kagahapon.
Mao kini ang ikaduhang titulo nga naangkon ni Lee sulod lang sa tulo ka mga semana.
Ang pambatong long-distance runner sa Spectrum Runners Club mitaak sa finish line sulod sa usa ka oras, 11 ka mga minutos ug 19 ka mga segundos.
Si Lee, kinsa usa ka Computer Engineering graduate sa University of Cebu, gisundan ni Azlan Pagay, kinsa mitali og oras nga 1:11:42.
Miangkon sa ikatulong dapit mao si Joseph Emia sa Cebu City Rider Omega Team, kinsa adunay oras nga 1:12:23.
Ang sunodsunod niyang pagsalmot og marathon events sa Sugbo tipik sa preparasyon ni Lee alang sa iyang kampanya sa 2019 Milo Marathon Regional Finals-Cebu Leg nga sugdan karong Septiyemnbre 29.
Sa women’s 21K, si Sultan Kudarat-native Ruffa Sorongon maoy midaog pinaagi sa oras nga 1:31:42.
Nagsunod kang Sorongon mao sila si Stephanie Cadosale (1:34:20) ug Cherry Andrin (1:35:09).
Sa ilang kalampusan, sila si Lee ug Sorongon nakadawat og P5,000 nga ganti matag usa.
Ang lumba, nga gilangkuban sab og 12K ug 6K categories, gipasiugdahan sa Sacred Heart School-Ateneo de Cebu Alumni Batch 1994. (RSC)