Pacquiao mileksyon ni Thurman

NAPAMATUD-AN ni Filipino boxing icon Manny Pacquiao nga aduna pa siya’y saktong ikabuga sa edad nga 40 dihang iyang gilupig si American Keith Thurman pinaagi sa split decision kagahapon sa MGM Grand Garden sa Las Vegas, USA.

Sa 1st round pa lang, gipatilaw na ni Pacquiao sa kusog niyang mga kinumo si Thurman, kinsa natikangkang human maigo sa right hook sa Pambansang Kamao ng Pilipinas.

Nakabangon ra hinuon dayon si Thurman gikan sa maong pagkatumba.

Tatawng nipatigbabaw ang abilidad sa bugtong 8-division world champion sa nag-unang rounds apan adunay mga higayon sa tungatungang bahin sa away nga nakabawi si Thurman.

Sa ulahing bahin, midominar na sab si Pacquiao hilabi na sa 10th round diin tatawng narugi si Thurman human maigo og body shot sa fighting senator.

Duha ka judges ang parehong mitali og 115-112 sa ilang tagsatagsa ka scorecard pabor kang Pacquiao samtang ang usa judge mipadaog kang Thurman.

Sa kadaugan, nailog ni Pacquiao ang World Boxing Association (WBA) welterweight super title aron idugang sa iyang WBA welterweight regular title.

“It was fun. My opponent is a good fighter and boxer. He was strong. ... I think he did his best, and I did my best. I think we made the fans happy tonight because it was a good fight,” matod ni Pacquiao.

Si Pacquiao misaka sa 62-7-2, 39KOs nga rekord samtang si Thurman, kinsa nakatilaw sa labing una niyang pilde, natagak sa 29-1, 22KOs nga baraha.

Nagkanayon si Pacquiao nga nakadayeg siya sa abilidad ni Thurman ug iyaha pa kining gitambagan.

“His journey does not end tonight,” matod ni Pacquiao kabahin kang Thurman. “He has a lot of future... Don’t be discourage; this is part of boxing.”

Miangkon si Thurman nga nalupig siya sa mas maayong boksidor apan gianugnan siya sa kahigayunan diin alang kaniya, posibleng siya maoy midaog kon wala pa siya natumba sa 1st round.

Matod ni Thurman nga nakat-on siya’g leksyon ning maong away nga iyang puwede niyang magamit sa ugma damlag.

“I knew it was close. He had the momentum because he got the knockdown in Round 1. ... I wish I had a little bit more output to go toe to toe. My conditioning, my output was just behind Manny Pacquiao’s tonight. Tonight was a blessing and a lesson,” asoy ni Thurman.

Nanghinaot si Thurman nga ikaharong niya’g balik si Pacquiao. (AP, ESL)