BUOT ni Gobernador Gwen Garcia nga mopaambit ang pito ka component cities sa 30 porsyento nga bahin sa ilang real property tax (RPT) ngadto sa kagamhanan sa probinsya sa Sugbo.
Ang gobernador dihang kongresista pa sa ikatulong distrito sa Sugbo, niduso og House Bill No. 1299 niadtong 2013 nga nagtinguha nga maamendahan ang Section 271 sa Republic Act 7160 kun ang Local Government Code (LGC).
Sa balaudnon, giingon ni Garcia nga samtang ang component cities padayon makabotar og mga position sa lalawigan, apan wa sila kinahanglana nga mopaambit sa ilang bahin sa RPT, dili susama sa kalungsuran.
“But sad to say, ang atong share nga 30 percent magagikan lamang kana sa mga kalungsuran, dili sa mga siyudad,” padayag sa gobernador dihang nahinabi sa mga tigbalita human sa general assembly sa mga barangay kapitan sa lalawigan niadtong Hulyo 19 sa IC3.
Usa kini sa pipila ka provisions sa LGC nga buot ni Garcia nga maamendahan sa nahabilin nga tulo ka tuig sa administrasyon ni Presidente Rodrigo Duterte nga iyang gihulagway nga parochial kaayo apan duna kini national significance sa mga local government unit labi na sa mga probinsya.
Karong Lunes sa hapon, Hulyo 22, ang Presidente mohatag sa iyang State of the Nation Address (Sona) kun ang pagyagyag sa kalampusan sa mga programa ug proyekto nga gipatuman sa iyang administrasyon sa miaging usa ka tuig.
Sumala ni Garcia nga angay mopaambit ang mga dakbayan sa lalawigan sa bahin sa ilang RPT gumikan kay ang probinsya nagtabang gihapon nila, apan wala kini makuha gikan sa mga siyudad.
“Ang probinsya maoy gamay kaayo og earning capacity. Dili pareha sa siyudad nga mas dako ang ilang makolekta sa uban pang mga taxes nga ilang maimponer sa negosyo sama pananglit mga business taxes, sa business permits nila. Ang ato kada kuan sa atong income is only coming from our share of the real property tax,” sigon sa gobernador.
Ang lalawigan adunay 44 ka mga lungsod ug pito ka component cities nga gilangkuban sa Talisay, Naga, Carcar, Toledo, Danao, Bogo ug Mandaue.
Apil sa gusto ni Garcia nga ilhon sa estado ang annulment nga giaprobahan sa simbahan aron maminosan ang gastuan sa mga magtiayon nga gusto ipaway bilin ang ilang kaminyuon.
Niduso usab siya og balaudnon alang niini nga gipasar sa hawanan sa Ubos Balay Balauranan apan matod niya gilingkuran didto sa Senado sa usa ka senadora.
“In fact, ang CBCP (Catholic Bishops Conference of the Philippines) was with us kay that is in line with Pope Francis nga statement dili na lisudlisuron ang pagkuha og church annulment.
Ang gobernador namahayag ang balaudnon nga iyang gihulagway nga pro-poor kay makatabang kini sa magtiayon nga mapasayon ang proseso ug dili makagasto og dako kon magpa-annul sa korte nga gibanabana mogasto og P200,000 diin mobayad pa kini og abogado.
Laing provision sa LGC nga gusto ni Garcia nga maamendahan usab ang pag-rationalize sa income requirement sa paghimo og lalawigan.
Si Garcia nipasabot ang income requirement sa munisipyo aron mahimong siyudad kay gisaka na ngadto sa P100 milyones gikan sa P20 milyones. Apan ang income requirement aron mahimo nga lalawigan nagpabilin gihapon sa P20 milyones.
Siya nidugang ang iyang igsuon nga si 3rd District Cong. Pablo John Garcia nipasalig niya nga moduso sa susamang mga balaudnon nga iyang giduso apil ang amendment sa automated election law. (SCG)