Nadela: Disgrasya sa kadalanan mahimong malikayan

NAGBANGUTAN ang lungsod sa Boljoon sa habagatang Sugbo tungod sa kamatayon sa ilang mga tinun-an sa niaging Biyernes. Ang maong mga tinun-an sakay sa usa ka mini dumptruck nga gipanag-iya sa munisipyo aron mosalmot unta sa District Meet nga gipasiugdahan Department of Education. Inay Distruct Meet ang ilang padulngan kamatayon og tambalanan ang ilang gitugpahan humsn maligid ang mini dumptruck nga ilang gisakyan.

Ang rason sa driver nga si Danilo Niere nawad-an og brake ang sakyanan. Kini nga rason wa kalawata sa mga imbestigador. Mao sab ni ang sagad natong madunggan sa daghang disgrasya sa kadalanan. Unta to nagpahinay lang siya og padagan tungod sa kadaghan sa kinabuhi nga iyang gikarga. Pagka anugon sa mga bata.

Pinaagi unta sa maong kalihukan nga ilang salmotan maghatag kini nila og kahigayonan nga makapakita og labok sa ilang tagsa tagsa ka talento. Kung makapa kita og maayong labok maghatag sab nila og kahigayonan nga mas dagkong kalihukan ang ilang masalmotan. Sa ingon niini nga paagi kinsay nasayod nga sa ilang grupo dunay pipila nga mahimong inila og maghatag kanila og maayong ugma.

Di ba daghang athlete nga nahimong varsity player kansang abilidad nadiskubrehan sa District Meet? Sayang. Kanang mga nanga angol unsa pa may ugma nga mapaabot? Kinahanglan nga dunay manubag og kahatagan og hustisya ang mga nangamatay. Sayon ra sultion nga motunol ta og tabang pinansiyal.

Ang kaguol og kasakit nga gibati sa mga pamilyang hingtungdan di kabayran og sapi. Sa mga lokal nga kagamhanan nga nagpadagan og mga sakyanan angay nga mo-review sa ilang mga polisiya sa pagpa gamit sa maong sakyanan.

Kadaghan naman gud ta ka kita og truck sa gobyerno nga namuwak og daghang pasahero unya ra ba kusog kaayong makapadagan ang driver. Kasagaran aning mga pasahero nanghitch og sakay kay molugsong sa lungsod para manabo. Ang uban mohatod og lubong. Ang uban sab tuyong mogamit sa sakyanan, mananghid sa mayor kay manambong og kasal.

Naa man gani koy nakit-an nga gisakyan og pilgrims padung sa Birhen sa Lindogon. Sa niaging kampanya sa eleksiyon ang hinakutay sa mga dumadapig nag gamit gihapon sa maong mga sakyanan. Ang rason man gud sa uban unsaon nanghangyo man mao nga lisod balibaran.

***

Nagpaabot ta nga makumpleto na ang imbestigasyon sa maong insidente. Atong hagit sa awtoridad, nga hugtan ang monitoring ning maong mga sakyanan. Ang mga mayor mo-review sab sa kualipikasyon sa mga driver nga ilang gi-hire. Apil na ang mga driver sa ambulansiya. Duna untay periodic nga seminar nga ipatuman isip paagi paglab-as sa kapasidad sa mga driver. Mao sab unta ni ang buhaton bisan sa mga driver sa mga pribadong sakyanan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph