ANG mga Pilipino maayong mobalak. Ang buwan ug kabituonan mahisgotan pirmi sa maong mga balak. Duna pay manguyab nga mosaad nga langkaton ang buwan gikan sa langit aron ikorona sa babayeng gipanguyaban. Kutluon pang mga bituon ug idayandayan sa iyang dughan.
Apan inig ka minyo na, gaan kaayog kamot nga modapat sa asawa. Manumbag ug kon maigo ang mata, makakita ang asawa og mga bituon. Inig ka ugma, ang resulta black-eye ang mata, morag buwan.
Samtang dunay niingon nga daghan nang mga Pilipino nga niabot sa buwan. Kay matod pas taga Cabadiangan, daghang mga babaye nga nag-astronaut. Nagpabuwan diay, nagpa-maid ba.
***
Gisaulog sa Estados Unidos niadtong Sabado, Hulyo 20, atol sa kasal sa anak ni Police Col. Erson Digal, si Dr. Jennifer Digal ug sa iyang bana nga si Marvin Figueroa, ang ika-50 nga anibersaryo sa unang pagtunob sa tawo sa buwan.
Mao kini ang makasaysayanong first moon landing sa Apollo 11 niadtong Hulyo 20, 1969. Ang crew sa Apollo 11 naglakip nila ni Neil Armstrong, commander; Michael Collins, module pilot; ug si Edwin “Buzz” Aldrin, lunar module pilot.
Si Armstrong natala sa kasaysayan nga maoy unang tawo nga nakatunob sa buwan, didto sa “Sea of Tranquility.” Mga pulong nga iyang nalitok nga managingting lahos sa katuigan, mao kini, “That’s one small step for man, one giant leap for mankind.” Labing unang mga tunob sa tawo sa laing kalibotan.
***
Way space program ang Pilipinas, busa kutob ra sa damgo nga dunay Pilipino nga makatunob sa buwan. Si Juan Karlos nga taga Consolacion kutob ra sa pagkanta sa popular kaayong “Buwan” nga duna nay kapin sa usa ka gatos ka milyon nga views sa YouTube.
Ginaingon nga kadtong magsigi lang og duko sa pamasin nga makakita og sensiyo di makakita sa buwan ug sa mga bituon sa kalangitan. Bisan si Juan Karlos kuwang sa suporta sa X iyang pagsalmot sa usa ka singing contest, sa 13 anyos pa siya niadtong 2014.