TUNGOD sa sige og kauswag ang eleksyon sa barangay, nihangyo si Liga ng mga Barangay Cebu Province chapter President Celestino “Tining” Martinez III sa mga magbabalaod nga motakda og klaro kon pila ka tuig ang termino sa mga barangay kapitan.
Gisulti kini sa ex officio member sa Sangguniang Panlalawigan sa Sugbo human sa mga sugyot balaudnon nga giduso sa Ubos Bay Balauranan ug Senado nga nagtinguha ioktaba na usab ang gitakda nga eleksyon sa Mayo 2020.
Matod ni Martinez, bisan kondili nag-unang prayoridad sa barangay ang eleksyon kondili ang pagpaabot sa batakang serbisyo ngadto sa katawhan, apan angay usab ikonsiderar ang paghatag og igong panahon sa mga barangay kapitan nga mapatuman ang mga proyekto ug mga programa labi na kadtong dunay gagmayng pundo.
“Ang argument diha is not how many years. Ang request sa mga barangay is to set a standard nga kon three, three, kon four, four, kon five, five. Naa jud siya specific time ba so that they can plan ahead,” pahayag ni Martinez.
Human maaprobahan ang Republic Act 10952 niadtong Oktubre 2, 2017, ang termino sa incumbent nga mga opisyal sa kabarangayan kay naminosan ngadto sa duha ka tuig. Kini nga balaod maoy nag-uswag sa 2017 barangay ug Sangguniang Kabataan (SK) elections ngadto sa ikaduhang Lunes sa Mayo 2018.
Sumala ni Martinez nabati nila nga ubos ang patan-aw sa ilaha sa barangay kay nagsige na lang og kairog ang pagpahigayon sa piniliay sa barangay.
“For a time, it feels man gud and we feel like tungod kay gisige na lang mi og move move move, mura bag naa bay diyotay pagtan-aw namo gud. Minamaliit ang barangay tungod kay wa may set of standards that we have to follow when it comes to our terms. Mura bag, sige na lang i-extend na lang nato, depende sa naghangyo,” pahayag ni Martinez atol sa general assembly sa mga barangay kapitan sa lalawigan sa Sugbo niadtong Biyernes, Hulyo 19, 2019.
Dili siya makasulti kon pila ka tuig ang paigo sa usa ka termino sa mga opisyal sa barangay dihang gipangutana kini sa mga tigbalita.
Apan ang iyang gusto nga mahatagan sila og igong panahon nga mapatuman ang mga proyekto ug programa alang sa ilang mga konstituwente.
Sa Senado, si Senador Christopher Lawrence “Bong” Go nisang-at og balaudnon nga magsibog sa synchronized barangay ug SK elections gikan sa Mayo 2020 ngadto na sa Oktubre 2022.
Sa buwag nga sugyot balaudnon ni Senador Imee Marcos, tinguha niini ng mapahigayon ang eleksyon sa barangay ug SK ngadto sa Mayo 2023.
Samtang sa House Bill 905 ni Kong. Johnny Pimentel, gisugyot niii nga sa Oktubre 11, 2021 ipahigayon ang barangay elections kun unom ka buwan sa dili pa ang presidential elections sa 2022.
Alang ni Martinez, apeke na kon himuon ang eleksyon sa barangay duol sa nasudnong piniliay. (SCG)