GILUBONG na gahapon ang siyam ka mga biktima sa pampublikong lubnganan sa lungsod sa Boljoon kagahapon, Hulyo 21.
Gibanabana nga kapin sa usa ka libo ang nihatod sa mga biktima ngadto sa ilang lubnganan.
Malinawon ang paglubong gawas sa duha ka inahan nga gidali ug tabang diha sa sementeryo tungod sa labihan nga kasubo gidungagan sa grabeng kainit.
Wa kapugngi sa pamilya ug kabanay sa mga biktima ang pagsyagit ug paghilak diha pa lang sulod sa Poblacion Boljoon Cebu Sports Complex diin gilaray ang patayng lawas sa mga biktima.
Ang classmates sa mga biktima nga nakaluwas sa panghitabo misaysay sa ilang kaagi nga matod pa, presko ug dili gyud nila malimtan.
Usa sa mga nakalingkawas mao si Lutchie Mae Rota, 11, nakapanawag pa siya ug tabang matod pa, apan mitulo nalang ang iyang luha tungod kay nakita na niya iyang mga kaubanan nga wa na’y kinabuhi ug wa dayo’y nakatabang kanila.
Dako gihapon ang iyang pagpasalamat sa Ginoo sa ikaduhang kinabuhi nga gihatag kaniya.
Lakip sab sa nakalingkawas apan nakaangkon ug mga samad sa lawas ang 12 anyos, runner nga si Adrian Villanueva ug ang iyang inahan nga si Susan Villanueva, 53.
Matod ni Adrian nga miuban ang iyang kuya nga grade 12 student tungod kay buot niini nga supportahan ang iyang manghud sa lumba sa pagdagan.
Apan dako ang ilang kasakit human lakip ang iyang maguwang nga si Alexander Villanueva sa mga nakalas.
Si Msgr. Ruben Labajo, parish priest sa Boljoon, sa iyang mensahe, niingon nga dili gusto sa Ginoo ang nahitabo apan duna kini buot ipaabot ug sa sakto nga panahon, mahibaw-an ang tinuod nga katuyoan sa tanan.
Atol sa lubong sa mga biktima gikahinabi sa Super Balita Cebu ang driver sa mini dump truck nga anaa gitanggong sa Boljoon Police Station.
“Sorry”, kini lang ang pulong nga nagbalik-balik pagguwa sa baba ni Danilo Niere atol sa lubong sa mga biktima.
Matod niya nga wa niya gituyo ug wa usab siya’y kontrol sa maong panghitabo.
Ang kapulisan sa Boljoon mitataw nga andam na ang affidavit sa mga nakalas nga biktima ug karong adlawa, Hulyo 22, isang-at nila kini ngadto sa prosecutor’s office.
Kasong Reckless imprudence resulting in multiple homicide and physical injuries ang atubangon ni Niere sa maong panghitabo.
Hinuon, midawat siya sa iyang sayop ug miingong andam siya nga hukm sa korte batok kaniya. (ANV)