USA ka 41 anyos nga lalake ang namatay dihang giatake sa kasingkasing human sa away ni Manny Pacquiao batok ni Keith Thurman kagahapon sa udto (oras sa Pilipinas), Dominggo, Hulyo 21, sa Las Vegas Nevada, USA.
Ang biktima mao si Lorenz Dizon giingong nagtan-aw sa maong away sa Barangay Kalunasan, dakbayan sa Sugbo.
Sa pag-uli sa biktima sa ilang balay, naglisod kini og ginhawa ug nitawag og ambulansya ang pamilya ni Dizon pasado ala 1:30 sa hapon.
Niresponde ang ambulansya sa Barangay Guadalupe, apan gideklara nga dead-on-arrival si Dizon sa Vicente Sotto Memorial Medical Center alas 2:33 sa hapon.
Samtang, usa ka 60 anyos nga si Margarito Casquejo ang gidala sa Cebu City Medical Center dihang giatake sab human sa away ni Pacquiao, pasado 1:30 sa hapon.
Ang biktima nitan-aw sa pay-per-view nga away sa Barangay Sawang Calero.
Sa laing bahin, gihulagway sa Cebu City Police Office nga nagmalinawon ang sitwasyon sa tibuok siyudad sa Sugbo atol sa Pacquiao-Thurman fight.
Matod ni Police Major Randy Caballes, hepe sa Operation Branch sa Cebu City Police Office (CCPO) nga wala silay natala nga bisan unsa nga krimen nga nahitabo.
Mingaw ang nag-unang kadalanan sa dakbayan nga magpamatuod nga nakatutok ang mga tawo sa telebisyon sa away sa pambansang kamao.
"Mao rana ang incident nga nahitabo from 11am to 1pm, kada duwa aning Senator Manny zero crime man ni pirme sa Cebu City,” matod ni Caballes.
Gi-monitor sa CCPO pagka human sa duwa ni Pacquiao ilabi na sa downtown area.
Malinawon usab ang kahimtang sa ubang bahin sa lalawigan sa Sugbo.