JARO, Leyte -- Barangay kapitana ug mga kauban gipauwanan og bala samtang sakay sa usa ka sakyanan didto sa lungsod sa Jaro sa Leyte, alas 6 sa gabie, Dominggo, Hulyo 21, 2019.
Ang mga biktima mao sila si Estrella Geraldo, 62, kapitan sa Barangay San Pedro, Tunga Leyte; Leopoldo Po, driver; Ailen Po, maestra; Rachel Cuña, 27.
Wala naman maunsa si Wilfredo Gerlado ug ang duha ka kaubang bata nga nag-edad og 6 ug 4 anyos.
Ang kapulisan sa Jaro pagkadawat sa maong impormasyon dali nga miadto sa Barangay Hibucawan diin nahitabo ang insidente.
Sa pagsusi ni Police Senior Master Sergeant Ronald Pedrique, gidala na sa tambalanan sa Tacloban ang mga biktima.
Sa inisyal nga imbestigasyon, gikan sa Tacloban pauli sa Tunga Leyte ang mga biktima sakay sa usa ka Suzuki Ertega.
Pag abot sa Hibucawan, gigukod kini og laing sakyanan diin sakay ang mga responsable ug gisugdan pagpamusil.
Naigo sa ulo ang drayber nga si Po ug ang maestra nga si Ailen.
Naigo usab sa likod sa ilang lawas ang kapitana ug si Cuña.
Pipila ka basiyo sa wa matino nga kalibre ang nakuha sa crime scene ug gidala sa Crime Laboratory.
Padayon pa ang imbestigasyon sa posibleng motibo sa krimen.
Sa paghimo ning balita, wala pa masayri ang kondisyon sa mga biktima nga gipangdala sa tambalanan. (JKDP)