LALAKE nga napalgang nagbitay sa taytayan sa Cebu South Coastal Road, Sitio Isla Verde, Barangay San Isidro, dakbayan sa Talisay kagahapon sa sayo sa buntag, Hulyo 22, biktima sa summary execution.
Sa ato pa, gi-salvage.
Nasuta sa imbestigasyon ug background check sa kapulisan nga ang gabitay mao si Renante Otero, 44, ug taga Sitio Ilang-Ilang sa barangay San Isidro.
Dugang nasayran sa kapulisan nga dunay kalambigitan kini sa ilegal nga drugas sa Talisay ug siyudad sa Sugbo ug suspek sa mga krimen sa dapit.
GipusiL
Gawas nga gibitay, si Otero adunay samad pinusilan, naligo sa kaugalingong dugo, gitaptapan ang nawong og masking tape, gigapos ug gikwentasan og karton nga dunay pulong nga “Ayaw Ko Sunda, Tulisan Ko.”
Gitusaktusak sa bala sa 9mm ug kalibre 45 nga armas ang lawas ni Otero.
Na-recover usab sa crime scene ang siyam ka kabhang sa maong mga armas.
Sigon sa mga lumolupyo, gipukaw sila sa makadaghan nga buto nga ilang nadunggan alas tres sa kaadlawon, apan wala na sila mangusyoso tungod sa ilang kahadlok.
Ug pagka buntag sa pag-abot na sa uban pang residente sa lugar sa nahitaboan, nailhan nila kini tungod sa dagkong patik nga anaa sa tuong bahin sa iyang bukton ug paa.
Mikompirmar
Gibutyag ni San Isidro Barangay Kapitan Adelaida Restauro nga human sa sunod–unod nga insidente sa tulis ug kawat sa dapit, kalit lang nga nawagtang diha sa maong sitio si Otero ug ang pamilya niini.
“Taga Isla Puwa na siya pero naay nagsulti nga silingan niya nga nawala na sila ug pila ka months dinha sa Isla Puwa unya karon nalang na nila nakit-an nga namatay na nga gibitay nanya nailhan man siya sa iyang patik gud,” sumala sa kapitan.
Sa nahimutangan ni Otero, naglisod pagpaubos ang rescuers sa Talisay sa lawas niini.
Unang gidakop si Otero sa kapulisan niadtong Pebrero 2017 sa dakbayan sa Sugbo sa kasong pagpanulis.
Gibutyag usab ni PCapt. Nazarino Emia, deputy chief sa Talisay Police Station, nga anaa usab si Otero sa listahan sa mga padayong gipangita sa kapulisan tungod sa kalambigitan niini sa ilegal nga drugas.
Hangtod karon, blanko pa ang kapulisan sa hinungdan sa maong panghitabo.
Walay CCTV
Ang Superbalita Cebu nisuway pagsusi kon duna ba’y footage ang Command Center sa dakbayan apan, matod ni CT-TODA Operations Head, Jonathan “Joy” Tumulak, nga wala silay mahatag nga footage.
“Wala gyud ta’y mahatag nga footage sa hitabo kay wala man gud na’y CCTV diha tungura pero we are willing nga mucooperate pero kung asa lang sila niagi amo silang makit-an hangtod asa sila dapit nisulod,” matod ni Tumulak.
Mayor naalarma
Una nang naalarma ang myor sa dakbayan, Gerald Anthony “Samsam” Gullas sa sunod-sunod nga sumbong diha sa iyang opisina kabahin sa managsunog nga insidente sa tulis sa dapit.
“I have received several complaints from some netizens living in Talisay on incidents of highway robbery in our city. Aside from that netizen’s post more concerned citizens also sent me messages of their personal experience being robbed by armed men along the city streets,” tipik sa Facebook post sa mayor.
Hinungdan nga dali niyang gipakigkitaan ang bag-ong hepe sa kapulisan sa Talisay, Orlando Carag Jr. niadtong Hulyo 17, 2019 ug kinahanglan nga susihon ug imbestigaran ang mga panghitabo.
Lima ka adlaw ang miagi ug nabali na ang panghitabo, ang gipasanginlan nga tulisan ang nabiktima sa linuog nga krimen.
Pinaagi sa iyang Facebook page, ang mayor sa siyudad mimando sa kapulisan nga mas palawman pa ang imbestigasyon ug sulbaron sa hinanali ang maong kaso ug kon kinsa ang responsable sa maong panghitabo.
“I have ordered Major Carag to immediately solve the matter and if possible, identify the culprits and put them behind bars...I urged my constituents to trust on the police to solve the murder,” post sa mayor sa iyang Facebook.
Samtang kon leksyon kini alang sa uban, ang kawani sa City Social Welfare and Development sa Talisay Antonio Pader miingon nga dili angay paduolon o patan-awon ang kabataan sa mga susamang panghitabo sa social media tungod sa psychological effect ug posibleng makamugna ug trauma sa mga bata.