GISWELDUHAN ang mokabat 1,370 ka batan-on nga naggikan sa nagkalain-laing dapit sa Misamis Oriental atol sa culminating activity sa Special Program for Employment of Students (SPES).
Kini nga mga batan-on nag summer job og 20 ka adlaw niadtong bulan sa Mayo kon asa sa gidaghanon moabot sa 470 ang makadawat og sweldo nga tag P9,073.60 human miabag ang Department of Labor and Employment (DOLE) sa P5, 444.000 nga sweldo gikan sa kagamhanan sa probinsya labina sa buhatan sa Provincial Employment and Services Office (Peso).
“Ako nanghinaot nga kanang madawat nga inyong hinagoan inyo untang magamit para sa pag ugmad ug pag-abante sa pagtungha. I hope you know how hard it was to work, I hope nga makatabang sa kaugmaon ug sa inyong ginikanan ug inyong nabati unsa kalisod mangita og kwarta unsa kahago sa imong mama kalisod sa imong papa kada adlaw, moadto og trabahoan mag uma mag mason, pero ingon ana kahago ang giagian kada adlaw,” matud ni Governor Bambi.
“Ang imong pag-antos karon maoy imong kaugmaon ugma damlag,” dugang niini ug mapasigarbuhon kining miingon nga sukad sa iyang pamunoan isip gobernador moabot na ngadto sa 5,300 ka mga batan-on ang nakapahimulos sa SPES.
“Unom ka tuig nga nilabay kabalo mo pila ang natabangan sa SPES sukad sa atong paglingkod moabot na ngadto sa 5,300 ang napatrabaho sa summer job,” matud niini.