SA KASAMTANGAN nga record sa buhatan sa Department of Health (DOH)-Northern Mindanao moabot na ngadto sa 44 ang namatay gumikan sa dengue sa tibuok rehiyon.
Kini ang pagkumpirmar ni DOH-Northern Mindanao Assistant Regional Director Dr. David Mendoza ug miingon nga ubos pa kini kon itandi sa susamang tuig ug bulan nga moabot ngadto sa 54 ang natalang patay.
Sa pagkakaron adunay 11, 220 ang kaso niini kon asa 44 niini ang namatay gumikan sa dengue.
“Taas last year kay misobra na sa level ug delikado na gyod tong last year,” pasabot ni Mendoza.
Ang lokal nga kagamhanan sa Syudad sa Cagayan de Oro nihimo na usab sila og mga lakang aron mapugngan ang pagkaylap sa sakit nga dengue.
Si Cagayan de Oro Mayor Oscar Moreno nanguna sa kampanya batok dengue human mitaas ang ihap sa kasong dengue dinhi sa siyudad.
Ilang gilusad sa City Health Office ang “house-to-house” awareness lakip pagpamilit og stickers.
Sugod Enero hangtud Hulyo ning tuiga moabot sa 1,156 kaso kompara sa 585 kaso lamang sa susamang mga bulan sa milabayng tuig ug 11 ang natalang patay. Nag-una ang Barangay Carmen sa top 10 ka mga barangay nga adunay taas nga ihap.
Gisundan kini sa mga barangay sa Canitoan, Lumbia, Balulang, Lapasan, Patag, Kauswagan, Gusa, Iponan, Bugo, Bulua, Macabalan ug Macasandig.