SUPERBALITA CEBU

Sugilanon: Estratehiya ni Agaw Estong

TAUDTAOD gyud nga nagnganga ang akong baba pagkasayod ko gikan ra sab ni Agaw Estong mismo nga mikandidato diay kini pagka mayor dinhi sa among lungsod sa Santander. Wala ko masayod kon unsa ang akong masulti. Dili lalim ang gibati kong kaulaw ug kabalaka human ko kini hisayri.

Maoy nahunahunaan ko ang mga libak ug bugalbugal unya sa mga tawo inigka sayod nila niini. Segurado ko nga mao man gyud ni unyay mahitabo, kay kinsa man intawoy makadawat kon simbako siya modaog. Karon pa unya mahitabo nga ang among mayor, gawas nga walay nahot,wala makatunob sa kolehiyo. Miabot pa gyod og dul-an bayente ka tuig una matapos niya ang hayisko; Tungod niini , nakahunahuna kong e-discourage siya aron dili madayon ang iyang pagdagan. Sultihan ko siya nga wala siyay purohan nga modaog.Bisan aduna akoy dakong katahap nga dili gyud kini motuman.Sayod na ako sa pagka tawo ni Agsw Estong. Ang iya lang nga hunahuna ug desisyon mao gyuy tuohan niyang ensakto.

“Aduna kaha tay tsansa nga modaog,Gaw?”sukna ko kaniya pamasin nga iya kong hisabtan.

“Segurado kaayo na ,Gaw!” puno sa kamasaligon niyang tubag.

“Unsay gibasehan nimo nianang mao mong pangagpas?” sunod kong pangutana.”Hinumdumi nga gawas nga di ka ilado,wa kay kuwarta ,wa kay political machinery, Ug labaw sa tanan wa pa gyud kay kasinatian sa pulitika.”

‘’Nabasahan ko ang pulso sa katawhan.Wala silay nauyonan aning duha ko ka mga kaatbang sa pagka mayor nga sila si Mayor Mejares kinsa daghang isyu sa pangurakot ug si Mr. Reynars sab himabaye ug hambogero. Busa segurado na nga ari sila mobotar nako.”

Atol sa adlaw sa pagsugod sa kampanya sa mga kandidato sa lokal nga posisyon sayo nga misungko si Agaw Estong kanako.

“Tabangi unya kog pamlastada aning mga campaign material nako ,Gaw.”

“Way kay lain niini, Gaw. sama pananglit sa poster?’ pangutana ko kaniya pagkakita ko nga mga sakong karaan lang ang iyang mga election material.

‘Gituyo ko kana aron mosalig ang mga tawo nga di gyud ko mangurakot kon mahimo na kong mayor kay wa gud koy gasto sa eleksiyon.”

“Asa ta man ni ipahimutang, Gaw?” nakahukom ko nga paundayonan ko na lang siya sa iyng gusto.

“Adto sa siyudad...”

“Ha?! Pero dia ka man modagan sa atoa?’

‘Mao ni akong political strategy, Gaw!”panghambog niya sa iyang ideya.”Mao ni atong bentaha.kay kadaghanan god sa mga molupyo ning atong dapit tua manginabuhi sa siyudad, busa sama ra nga naunhan nato sa pagpangampanya ang akong mga kaatbang!”

Human sa eleksiyon, kaadlawon na akong nahuli sa balay. Ug nianang pagka buntag nahipugwat ko sa makusog nga sangpit ni Agaw Estong.Mitambo ko sa bentana ug maoy misugat sa akong panan-aw ang mapungtanon niing panagway.

“Giatay! Mibudhi ka man kanako!’singgaak niya kanako.

“ Ngano gong nakaingon ka niana?’nagpaka-aron-ingnon kong nahibulong.

“Ngano nga na-sero man ko bisan diha mismo sa atong presinto?!’

“Kon way nibotar kanimo, Gaw, bisan usa, nagmatuod kana nga hasta ikaw wa sab mobotar sa imong kaugalingon! Busa, ayaw ihan-ok ang tanan mong pagbasaol ngari kanako!”

Buanga bitaw, Gaw!” Kalit nga milubad ang tuno sa iyang sinultihan.”Nalimot man hinuon ko nga kandidato diay ko dihang nakadawat kog usa ka libo ka pesos gikan ni Mayor Mejares!”. (KATAPUSAN)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph