KAPIN usa ka gatos ka mga traffic enforcers ubos sa Traffic Operations Development Authority (CT-TODA) sa dakbayan sa Talisay gipaubos sa kinalit nga drug test diha sa Talisay City Hall ganihang buntag.
Katuyuan sa pangu sa CT-TODA ang pag palig-on sa kredibilidad sa mga traffic enforcers nga maoy mupatuman sa mga balaod sa trapiko sa kadalanan sa dakbayan.
Usa ka emergency meeting lang ang nasayran nga tambongan sa 135 ka mga traffic enforcers nga gipatawag diha sa People’s Hall sa Talisay City Hall.
Sirado ang mga pultahan sa maong hall ug way gitugutan nga makagawas sa giingong meeting, apan kalit nalang mianunsyo ang pangu sa CT-TODA Joy Tumulak nga diha mismo mupaubos sila sa drug test.
Matod ni Tumulak nga ubos sa mando sa mayor, buot niini nga palig-unon ang kredibilidad sa mga tawo nga mupatuman sa balaod sa trapiko sa kadalanan sa dakbayan.
“Kini part sa programa sa atong mayor isip pagpalig-on sa credibilidad sa atong mga traffic enforcers isip paghatag bsad ug pagsalig sa publiko nga kining mga nanakop nila ligdong ug angayan nga katuohan tungod kay wa mugamit ug ilegal nga drugas," saysay ni Tumulak.
Matod ni Tumulak nga niadtong anaa pa siya madestino sa syudad sa Sugbo, daghan gyud ang mga traffic enforcers nga nagpositibo sa paggamit ug ginadiling drugas.
Dugang niya nga buot lang niya nga maniguro aron mahimong kasaligan ang maong mga enforcers.
“Sa akong pagstorya ganiha ako gyud sila giingnan nga kon duna may nag gamit diri isa ang kamot ug surrender nalang, apan wa may niisa nisunod man sila naglinya nag pa drug test,” matod pa ni Tumulak.
Ang magpositibo sa drug test taktakon sa pagpanerbisyo apan hatagan kini ug second chance sa syudad nga mupaubos sa after care program sulod sa tulo ka buwan ug kon maayo na kini ug buot muapply pag-usab, dawaton gihapon nila kini
Sa nahitabong pagpulong, gianunsyo usab ni Tumulak ang usbaw sa suhulan sa mga enforcers gikan sa P325 nga suhulan kaniadto karon P383 na ang suhol matag adlaw.
Kon sa kinatibuk-an dunay madawat nga P9,961 nga suhol ang mga kawani matag buwan ug duna pa kini accident insurance, subay niini madugangan usab ang oras sa ilang pagpanerbisyo sa kadalanan. Matod ni Tumulak nga sa nianang paagi, wa na’y rason nga magtinapol pa ang mga enforcers sa pag buhat sa ilang trabaho.
Pipila kanila ang miingon nga wala sila’y problema sa sistema nga gipatuman alang sa mga enforcers tungod kay alang nila mas mutaas usab ang pagtahod sa mga tawo sa balaod kon sila limpyo. (ANV)