HUMAN sa kalampusan nga naangkon kontra Keith Thurman, balik Pilipinas si Senator Manny Pacquaio.
Apan inay motambong sa ikaupat nga State of the Nation Address (Sona) kagahapon ni President Rodrigo R. Duterte, naka-absent ang Pinoy boxer, tungod sa kondisyon sa iyang mata.
Gibutyag sa kapikas niyang si Jinkee nga gimonitor sa doktor ang duha ka mata sa boksidor nga gireklamo niyang nagsakit.
Gitakda unta tong mobiyahe pabalik sa Pilipinas ang boksidor, diin mogikan kini og 3 a.m., Dominggo, Hulyo 21, 2019 gikan sa Las Vegas padung Manila human sa iyang duwa, apan gidid-an siya sa doktor nga mobiyahe dayon.
Gisultihan sab ang boksidor nga dili i-risgo ang kaugalingong panglawas nga mo-atraka sa taas nga biyahe human dayon sa iyang duwa.
Inay, mobiyahe sakay sa private plane ang boxing champ diin ang pag-abot niya karon, Martes, Hulyo 23, 2019 sakto sab sa pagtambong niya sa sesyon sa Senado.
Sa report sa ABS-CBN News giingong mi-alibyo na ang mata ni Pacquaio human kini malampurnas sa petroleum atol sa ilang bugno ni Thurman.
Sa pikas bahin, pabor sab ang Pinoy boxer sa giingong rematch nga gipabuhagay ni Thurman.
"Wala naman akong problema. Mas maganda nga 'yung may rematch," ni Pacman.