SUPERBALITA DAVAO

Roldan: Kanus-a kaha mahapsay ang dalan sa Emily?

NOTA BENE



DUHA ka makasaysayanong hitabo ang atong nasaksihan karong bag-o lang.

Niadtong Dominggo, Hulyo 21, 2019 gilukapa sa atong fighting Senator Manny “Pacman” Pacquiao ang hambugerong Amerikanong boksidor nga wa pay pildi nga si Keith Thurman sa unang round.

Medyo di lang maayo ang resulta kay split decision lang bisan kung atong nakita nga nanghilam-os og kinumo ang kontra sa atong Pambansang Kamao.

Matud pa sa mga Amerikanong announcers nga nag-cover sa away nga wa sila kasabot sa usa ka hurado nga naghatag og grabe ka taas nga grado kang Thurman nga daw wala niini makita ang away.

Mag-petisyon daw sila aron di na kini tugtan nga mahimong hurado sa bisan unsa pang away. Ingon pa sa mga eksperto nga “only in Nevada” nga mapalit daw ang dula sa boksing.

Sa laing bahin gipahigayon Lunes, Hulyo 22, 2019 ang ika-upat nga State of the Nation Address (Sona) ni Presidente Rodrigo Duterte isip pag-abli sa ika-18 nga kongreso sa Pilipinas.

Sa pagsulat nako niining lindog, wa pa mahitabo ang Sona busa akong pangagpas nga gisaysay sa pangulo ang nahimo sa iyang administrasyon sa nilabay’ng usa ka tuig.

Sa kataas sa iyang “approval rating” seguradong iyang pangayuon sa kongreso ug sa katawhan nga suportahan ang iyang mga “priority bills” ug mga programa kontra kurapsyon, kriminalidad, kapobrehon ug droga.

Sama sa mga nangaging Sona iyang ipadayag ang agi sa iyang “build-build-build” project ug ang hingpit nga kamugnaan sa Bangsamoro Autonomous Region for Muslim Mindanao (BARMM). Kita nga taga-Davao saksi sa dagkong proyektong imprastraktura.

Ang coastal road, mga kalsadang gipadako, mga lawak eskwelahan, ug uban pa. Ang Tugbok District sa Department of Public Works and Highways magsugod na sab sa ilang “river control project” sa Lampianao Bridge sa Calinan ug dalan gikan sa Callawa ngadto sa Lampianao hangtod na sa Lacson.

Mahinumduman nga naputol ang Lampianao Bridge niadtong Disyembre 23, 2017 tungod sa bagyong Vinta kay gikankan sa naghaguros nga tubig ang usa ka parte sa iyang pundasyon.

Nalipay kita sa progreso niining maong proyekto apan ang mga residente nga gikan sa Acacia, Indangan ug Cabantian nga may hastang daghanang “housing subdivisions” nagmug-ot gihapon.

Tiaw mo’ng gawas nga hinay ug dugay kaayo ang trabaho sa “road expansion”, grabe ang trapik diha sa mga “choke points” sama sa kanto nga gitung-an sa Emily Homes ug Deca Homes Cabantian, sa kanto Countryhomes Subdivision, Exit Road sa Emily Homes Subdivision ug sa Diho Road tapad sa simbahan sa Jehovah’s Witnesses sa may Cabantian gihapon.

Kini lang ang akong ikasugyot ni CCTMO chief Abude samtang nagpadayon pa ang “road expansion” nga unta butangan didto og kahibalo nga “traffic enforcers”, badlungon ang mga nagparadang sakyanan ilabi na sa mga van ug truck haduol sa “choke points,” idili ang pag-left turn pasulod sa Emily Homes gikan sa Milan og himuong “one way” ang kanhi Emily Exit road sa mga gustong mosulod sa subdivision.

Kinahanglan gayod og kahibalo nga traffic enforcers sa lugar kay gawas nga dili sila respetohon, mosugot silang naay mosingit nga mo-left turn bisan kung taas kaayo ang linya.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph