DAVAO DEL SUR -- Dako ang pasalamat sa Davao del Sur Police Provincial Office (DSPPO) nga nahimong hapsay ug malinawon ang gipahigayong Thanksgiving and Prayer Worship Convention ni Pastor Apollo Quiboloy sud sa Davao del Sur Sports Coliseum Dominggo, Hulyo 21, 2019.
Mokabat sa di momenos 10,000 ka mga sakop sa Kingdom of Jesus Christ, The Name Above Every Name, ang mitambong sa maong aktibidad gikan sa nagkadaiyang dapit sa nasud nga nagsugod ala-1 sa hapon.
Sumala ni Police Colonel Alan Manibog, police provincial director, nga kapin 500 ka mga security personnels ang gipakatap palibot sa venue.
Matod ni Manibog nga dako og gikatabang sa pagpatuman sa hugot nga seguridad ang gimugna nga Task Force Kingdom of Jesus Christ Inter-Agency Security Group diin nagsugod na pagbantay sukad adlaw’ng Sabado.
Apil sa giplastar sa maong Task Force ang paghan-ay sa trapiko ilabi pa nga nagpunsisok ang daghang sakyanan sa lugar.
“With the collaborative efforts of each and every personnel tasked to ensure the safety of everyone here in our AOR we have attained the zero incident on this activity,” panapos ni Manibog.
Wa sab mihimo og protesta ang mga investors nga naligsan dihang gituki ni Quiboloy ang Kapa Community Ministry International Inc., kauban si Presidente Rodrigo Duterte.
Si Quiboloy maoy gipasanginlan kun nganong naundang ang operasyon sa maong ministry nga nagpakolekta og donasyon bugti sa tubo nga 30 porsyento matag bulan.