KIDAPAWAN CITY -- Misukol ang duha ka mga iro aron nga panalipdan ug protektahan ang ilang agalon batok sa dakong cobra alas 2 sa hapon, Dominggo, Hulyo 21, 2019.
Gisaysay ni Jaime Selim, fastfood manager, nga gisulod sa lala nga cobra ang iyang balay sa Barangay Lanao sa dakbayan.
Apan namatikdan kini sa duha niya ka mga iro nga Dachshund (pudol) ang halas hinungdan nga ila kining gitabangan og atake.
Ang hitabo nakuhaan mismo og closed circuit television camera (CCTV) nga gimuntar sa balay ni Selim ug nakita kon gi-unsa sa pagpakigbatok sa mga iro sa bitin.
Apan makasubo gumikan kay human ang panagsangka, namatay ang usa sa duha ka iro nga kolor itom human napahitan sa bitin ug gikabalak-an nga mabuta ang laing usa nga iro nga kolor puti kay gibugahan og lala sa cobra.
Hinuon namatay sab ang cobra human maka-angkon og daghang mga pinaakan sa ulo ug lawas gikan sa mga iro.
Nagpasalamat si Selim sa duha niya ka mga iro nga nakigsangka sa cobra gumikan kay kon wala pa, posibleng adunay dautang mahitabo sa iyang usa ka tuig nga anak nga lalaki nga natulog niadtong panahona sulod sa iyang balay.
Sa pagsuwat ning balita, plano nga pasidunggan sa mga dog lovers/owners organization sa Kidapawan City ang duha ka iro nga nanalipod sa ilang agalon.