SUKWAHI sa mga pangagpas, nakaabot gyud og 12 ka rounds si Keith Thurman sa ilang unification World Boxing Association (WBA) welterweight title fight ni Manny Pacquiao niadtong Dominggo didto sa MGM Grand Garden Arena sa Las Vegas, Nevada.
Sagad man gud sa mga boxing experts, sa wala pa ang away, nagtuo nga ma-knockout si Thurman sa maong away tungod kay lagi naobserbahan nga haom ang iyang estelo ni Pacquiao.
Pero makamao man sab diay ni nga mo-adjust, hinungdan nga nakalahutay ug nakahuman gyud sa kinatibuk-ang away.
Hapit pa gani madisgrasya si Pacquiao kay ambot og naunsa tong usa ka judge nga mipadaog man ni Thurman hinungdan nga na split decision na lang hinuon ang nadag-an ni Pacquiao.
Atong gisuhid kon giunsa gyud ni judge Glenn Feldman pag-score ang matag round. Sa iyang scoring, midaog si Thurman sa ikatulo, ikaunom, ikapito, ikawalo, ikasiyam, ikanapulo ug ika-12 ka round.
So pito ka rounds ang nadag-an ni Thurman (114-113), samtang lima lang ang kang Pacquiao (1st, 2nd, 4th, 5th, ug 11th).
Kini dakong sukwahi sa nakita sa laing duha ka mga jugdes nga sila si Dave Moretti ug Tim Cheatam.
Si Moretti mipadaog ni Pacquiao sa first, second, fourth, fifth eighth, 10th ug 12th rounds samtang si Cheatam mitali og pabor sa fighting senator sa first, second, third, fourth, fifth, 10th ug 12th.
Ambot og unsay nakita ni Feldman sa 10th round nga bisan unsaon nato’g balik-balik og review sa video, maayo mang pagkasagunto sa bodega ni Thurman nga nakatalikod og ahat tungod sa kasakit nga gani mora og kaundangon na.
Gawas lang siguro og nalibat si Feldman sa iyang panan-aw hinungdan nga iyang napadaog si Thurman sa maong round.
Ang dakong tamparos sa maong judge mao ang pag-angkon ni Thurman nga lupig gyud siya sa maong away ilabi na kay natumba siya sa first round.
Tiaw mo na. Niangkon na ang boxer nga pildi siya pero alang ni Feldman daog diay si Thurman.
Sa pagpahibawo lang daan nga natapos ang away pinaagi sa split decision, midahunog dayon ang pag-boo sulod sa MGM Grand - timaan sa ilang protesta sa nakab-ot nga hukom. Wa kalikayi, napuno siya sa negatibong komento.
Anyway, a win is a win.
Hinuon, daghan ang nibilib sab ni Thurman kay nakapakita man sab siya hinuon og saktong labok. Wa siya mokakak bisan og kapila siya maantimano og igo.
Dili sama sa uban niyang nakontra nga kon makatilaw na sakit magsigi na lang og dagan-dagan sama nila ni Andrie Broner, Miguel Cotto ug uban pa.
Sa maong kadaugan, si Pacquiao mao na karon ang naghupot sa record nga pinaka-edaran nga world champion sa welterweight division.
Karon nga nagmalampuson siya sa iyang tahas batok ni Thurman, unsa may sunod plano sa Filipino boxing icon?
Sa post-fight interview, gibutyag ni Pacquiao nga sa sayong bahin sa sunod tuig, moaway na usab siya ug ning higayona, 41 anyos na siya.
Target niyang makontra mao ang modaog sa away nila ni Errol Spence Jr. ug Shawn Porter. Kining duha gikatakdang mag-away karong Septiyembre 28 ug tuyo ni Pacquiao nga motan-aw ning awaya.
Sa ato pa, dili gyud interesado si Pacquiao ni Amir Khan nga maoy perming manghagit kaniya. Kini gud si Khan lisod halinon ug way promoter nga mosugal og promote ani.
Nangita ron si Pacquiao ug kontra nga maka-draw og crowd sama ni Spence, 29, sa Texas nga may 25-0 nga record, 21 niini gipang-knockout.
Kini sab si Porter, 31, adunay 30-2-1, 17KOs nga record ug bisan tuod og taga Akron, Ohio ni natawo apan atoa na kini nanimuyo sa Las Vegas, Nevada.
Daghan ang mga sugyot nga angay na moretiro si Pacquiao tungod kay napruyba na niya ang tanan ug sa iyang edad karon angayan na pud mopahuway na.
Pero mora man og wala pa sa bokabularyo ni Pacquiao ang pagretiro. Batan-on pa ang iyang hunahuna.
Gani ang iyang kamaguwangang anak nga si Jimuel nanghinaot nga moretiro na ang iyang amahan, apan, sa samang higayon, andam gihapon siyang mosuporta niini kon unsa desisyon nga makab-ot.
By the way, nagtuo si Buboy Fernandez, ang asst. trainer ni Pacquiao, nga posibling dunay bali ang gusok ni Thurman sa dihang naigo kini sa solidong kumo ni Pacquiao sa ikanapulo nga round. Kon dili man gani bali, posibling seryuso nga injury ang naangkon niini. Mao usab kini ang pagtuo sa condition coach nga si Justine Fortune. (jun.migallen22@yahoo.com)