MGA duwa karon:
5:30 pm- USJ-R batok USC (college)
7:00 pm- UC batok SWU (college)
Angkunon og suway sa Southwestern University (SWU)-Phinma Cobras ang nahabiling luna sa top two sa ilang pagpakigbatik sa Joemang Surplus/University of Cebu (UC) Webmasters sa main game karong gabii sa Cebu Schools Athletic Foundation Inc. (Cesafi) Partners Cup 2019 college division sa Cebu Coliseum.
Ang Cobras kasamtangang naa sa ikaduhang puwesto bitbit ang 8-2 nga rekord sunod sa league-leader ARQ Builders/University of the Visayas Green Lancers, nga maoy miangkon sa No.1 nga luna dala ang 10-0 nga rekord.
Sa ilang bahin, ang Webmasters naa sa ikatulong dapit dala ang 7-3 nga rekord ug aduna pa sab sila’y poruhan nga makasulod sa top two kon ilang malupig ang Cobras ning higayuna.
Importante ang pagsulod sa top two gumikan kay nagtangag niini ang twice-to-beat nga bintaha alang sa nagkaduol nga semi-finals.
Ning puntoha, grabe ka taas ang moral sa Cobras gumikan kay gikan kini sa upat ka sunodsunod nga kadaugan sa 2nd round elimination.
Gawas niini, aduna sab psychological advantage ang Cobras gumikan kay ilaha mang gipangmakmak ang Webmasters, 88-79, sa ilang premirong panagsangka niadtong Hunyo 22.
Hinuon dili ikalimod dili bastabasta ang puwersa sa Webmasters ug aduna kini kapabilidad nga makabawos sa Cobras.
Sa premirong duwa, magsangka ang Cebu Landmasters/ University of San Carlos (USC) Warriors ug University of San Jose Recoletos (USJ-R) Jaguars.
Ang Warriors kasamtangang naa sa ikaupat nga luna dala ang 4-6 nga rekord ug nagsunod ang Panthers nga adunay 3-8 nga baraha.
Kon modaog ang Warriors ning sangkaa, hayan maseguro na nila ang ikaupat ug katapusang luna sa semi-finals ug motukmod sa Jaguars sa hingpit nga pagpanamilit.
Apan kon ang Jaguars maoy modaog, mahimo pang komplikado ang sitwasyon alang sa inilugay sa No.4 nga puwesto diin posibleng makaapil sa esena ang University of Southern Philippines Foundation (USPF) Panthers nga adunay 3-7 nga rekord. / (ESL)