MGA duwa karon:
4:30 pm- Ginebra batok Magnolia
7:00 pm- Rain or Shine batok Blackwater
Mosuway pagsulod sa semi-finals ang Brgy. Ginebra Gin Kings ug Rain or Shine Elasto Painters sa ilang pagpakigbatok og lainlaing kontra sa Game 2 sa best-of-three quarter-finals series sa PBA Commissioner’s Cup sa Araneta Coliseum.
Ang Gin Kings makigharong sa ilang igsuong puwersa nga Magnolia Ang Pambansang Manok sa premirong duwa samtang ang Elasto Painters makigsangka sa Blackwater Elite sa main game.
Ang Gin Kings, nga maoy defending champions, nagtinguha nga masundan ang ilang 85-79 nga kadaugan sa Game 1 aron dili na mahatagan og kahigayunan ang Hotshots nga makabangon.
Gitataw ni Ginebra coach Tim Cone nga pangandaman nila’g insakto kining komnbatiha gumikan kay seguradong mas lisod nga pagsuway ang ilang masugatan batok sa Hotshots.
“We have to handle it better on Tuesday, and make sure we are better prepared,” matod ni Cone sa PBA.PH.
“We got frustrated a lot throughout the game and our guys can’t afford to get frustrated, keep our focus on each possession.”
Gipasabot ni Cone nga kaduha na sab sila nakasinati nga midaog sila sa Game 1 sa best-of-three nga kombati apan nasagunsonan sila’g pilde sa nagsunod nga duha ka mga duwa.
Dili gusto ang Gin Kings nga mahitabo kini pagbalik.
Hinuon ning higayuna, dili na bastabasta malumpag ang puwersa sa Gin Kings ug mismong ang pambatong pointguard sa Hotshots nga si Paul Lee ang miangkon niini.
“They got (Justin) Brownlee, they got Stanley (Pringle), so nandoon ‘yung may piyesa sila para manalo every game,” matod ni Lee.
Hinuon gipasalig ni Lee nga buhaton nila ang tanan nilang makaya aron makabangon ning maong series.
Sa laing parisan, gilauman ang laing kulbahinam nga panag-enkuwentro tali sa Elasto Painters ug Elite.
Ang Elasto Painters munasginhawang ningbuntog sa Elite, 83-80, sa Game 1. ESL