ISYU. Dunay plano si Cebu Gob. Gwen Garcia nga ang mga component cities mogahin sa 30 porsiyento sa ilang kita sa real property tax nga ihatag ngadto sa probinsya. Iya ni nga balaodnon unta sa diha pa siya sa kongreso apan wa mapasar ug usa ka dakong posibilidad nga dili na ni mahisgotan sa 18th Congress gawas kon trabahuon ni sa iyang manghod nga si Kong. PJ Garcia, nga mipuli sa iyang pwesto.
Ang Probinsya sa Sugbo dunay 44 ka lungsod ug pito (7) ka component cities mao ni ang Bogo, Carcar, Danao, Mandaue, Naga, Talisay ug Toledo. Matud pa sa gobernadora nga ang probinsya gamay ra og kita sa real property tax dili sama sa mga dakbayan nga dako og kitaon sa buhis sa mga propridad ug uban pa.
Gani, morag namuyboy si gobernadora kay, matud pa niya, nagsige og hatag og ayuda ang probinsya sa mga component cities apan walay gihatag og balik agi og hinabang ngadto sa probinsya kining pito ka mga dakbayan. Ang Cebu city ug Lapu-Lapu city ra ang dili na ubos sa probinsya tungod kay highly urbanized city sila.
Ang gipamung ni gobernadora kabahin sa buhis nga amot gikan sa mga lungsod morag mosombalik kaniya tungod sa nahitabo didto sa Boljoon diin ang trak nga iya sa lungsod nga gisakyan sa mga estudyante nadiskarel. Pito ka estudyante ug duha ka hingkod ang namatay nga gilubong na niadtong Dominggo. Ang mga naangol gisakay sa pribado nga sakayanan ug gihatud sa duol nga hospital.
Ang lungsod sa Boljoon dunay ambulansya nga gihatag sa Kapitolyo sa panahon ni kanhi gobernador nga karon bise gobernador Junjun Davide. Apan sa paglingkod ni Gwen gikuha og balik ang ambulansya kay, matud pa, giimbentaryo. Dili tinuod ang storya nga nasuko ang gobernadora kay ang mayor didto misuporta sa iyang kaatbang sa miagi nga piliay.
Morag gisungog ang panggamhanan sa Boljoon kay sa pagdiskarel sa trak nga gisakyan sa mga estudyante gikan sa bukid nga mosalmot sa district meet, nabawi na sa probinsya ang ambulansya. Maayo gani kay dunay mga tawo nga maayo og gawi nga maoy nibulontaryo sa paghatud sa hospital sa mga naangol.
Ang pangutana, duna bay mireklamo o mibasol sa kagamhanan sa probinsya sa pagbawi sa ambulansya? Mora man og wala ko kabasa sa mga mantalaan o makadungog sa mga komentarista sa radyo nga dunay nireklamo sa isyu nga gikuha sa kapitolyo ang ambulansya nga gihatag sa Boljoon.
Sa gipamulong na ni Gwen, ang mga lungsod lakip na niini ang Boljoon nagtunol sa ilang 30 porsento nga kita sa real property tax nga bahin sa Kapitolyo. Sa ato pa, dunay katungod ang Boljoon nga maningil sa Kapitolyo sa mga ayuda sama sa ambulansya ug uban pa tungod kay nakahatag man sila sa 30 porsento nga ilang kita gikan sa real property tax.