HUMAN gibaha og mga negatibong komento sa social media, gibakwi ni Lapu-Lapu City Mayor Junard “Ahong” Chan ang iyang unang pamahayag ngadto sa reporters kalabot sa isyu sa electric-jeep.
Sa niaging semana, nakuhaan og pamayag si Chan nga dili siya gusto nga mopasulod sa e-jeep sa dakbayan kay makaapekto kini sa panginabuhi sa mga drayber sa traysikol ug multicab.
Gani matod niya nga iyang babagan ang laing 75 ka mga umaabot nga e-jeep nga madugang sa 25 ka mga unit nga kasamtangan nakabiyahi na.
Sa ambush interview nga nakuhaan og video sa mga tigbalita, tataw ang mga gipamulong ni Chan.
Apan pipila ka adlaw gikan sa interview, sa kalit lang nausab ang iyang intonada ug ning higayona iyang gipasanginlan ang mga media nga nasayop sa ilang balita.
Ning higayona, iyang gihimakak ang pasangil nga dili siya uyon sa e-jeep ug ang iyang giingon mao nga estudiyohan una sa siyudad ang rota niini.
“Ato lang giklaro nga kita dili ta supak sa modernization sa atong transportation, sayop na ang naa sa balita karon. Kita paborable gyud ta sa modernization, ang atoa lang gusto nato ma-review ang rota nato sa e-jeep,” matod ni Chan.
Dili ta ka basol ni Chan kon mausab ang iyang desisyon kalabot niini kay wa man gyud siyay mahimo kay lagi proyekto man kini sa administrasyton ni Presidente Rodrigo Duterte.
Pero ang wa nato masabti kon nganong ang media may iyang dut-an ug basulon sa iyang gipamahayag nga bisan og unsaon niya og pagpanghimakak aduna may video nga makasuporta sa iyang gipanulti?
Dili ba diay puwede nga iyang angkunon ang iyang pagbakwi nga di ipasangil og lain, kay kini programa man sa presidente.
Hinaot nakat-on unta ang bag-ong mayor og leksiyon sa iyang gibuhat.