DEVELOPMENT Bank of the Philippines (DBP) pormal nang nipahibalo sa korte nga gi-terminate o giputol na niini ang loan agreement tali sa Cebu Provincial Government.
Moabot sa P1.5 billion nga i-loan unta sa Kapitolyo gamiton pagpatukod sa Cebu Resource Center Project (CRCP).
Sa nasayran, ang DBP lakip sa mga respondent sa petition for injunction nga gisang-at ni kanhi Kongresista ug karon Cebu gobernador Gwendolyn Garcia ug ni kanhi bokal Alex Binghay ngadto sa Toledo City RTC subay sa tinguhang pagpugong sa implementasyon sa proyekto.
Sa manifestation with prayer for dismissal nga giduso sa abogado sa DBP nga si Atty. Joram Deogracias sa korte niadtong Hulyo 19, 2019, gitumbok niini nga nakadawat ang bangko ug suwat gikan kang Gob. Garcia niadtong Hulyo 3, 2019 nga nagpahibalo nga dili kabahin sa iyang mga program ang CRCP.
Sa susamang kalambuan, nakadawat ang bangko ug laing suwat gikan chief of staff sa gobernador nga si Atty. Frank Dinsay V nga wala nay plano ang Kapitolyo nga i-avail pa ang loan ug gikonsiderar na kini sa iyang administrasyon nga terminated tungod usab sa iyang pagpahunong sa katukoran sa proyekto.
Subay niini, gipadayag sa DBP nga wala nay bili ang pag-resolbar pa sa korte sa kaso ug nanghinaot kini nga i-dismiss na ang kaso.
“Consequently, DBP formally manifests and informs the Honorable Court that it considers the Omnibus Loan Agreement date 23 May 2018 entered into by and between the Province of Cebu and DBP as terminated and will no longer release the proceeds in favor of the Province of Cebu,” tipik sa manifestation sa DBP.
Subay niini, gipahibalo sa legal consultant ni Gob. Garcia nga si Atty. Marino Martinquilla nga i-withdraw na nila ang maong kaso batok sa DBP ug uban pang respondent nga silang kanhi gobernador Hilario Davide III, kanhi bise gobernador Agnes Magpale ug kanhi provincial administrator Mark Tolentino.
Matod ni Martinquilla nga karong adlawa, Hulyo 23, niya iduso sa korte ang dokumento alang sa pormal nga withdrawal sa kaso.
Dugang niya nga karong giputol na ang loan agreement sa CRCP ug human gipahunong ni Gob. Garcia ang pagtrabaho sa proyekto, gitumbok niya nga dili na gyud kini madayon busa wala na usay bili ang kaso.
“As far as the civil case is concerned, what we are praying in that civil case is only nga ma-enjoin ang implementation sa project. Wala man mi mangayo ug damages adto sa project.”
“So considering nga moot and academic na man ang implementation kay si Gov. Gwen na man maoy governor so it would be a waste of the time and resources of the court to proceed with the case,” pasabot ni Martinquilla.
Dili na usab nila mapaningil ang mga respondent nga silang Davide, Magpale ug Tolentino kay wala naman sab sila sa posisyon.
Dili hinuon sila hingpit nga makalingkawas sa kaso kay nakapasaka man sab ug reklamong kriminal ug administratiba si Garcia batok kanila sa Ombudsman subay gihapon sa isyu sa resource center pipila ka adlaw sa wala pa ang eleksiyon niadtong Mayo 13.
Ang mga kasong gisang-at ni Garcia sa anti-graft office naglakip sa kalapasan sa Anti-Graft and Corrupt Practices Act, Grave Misconduct ug Conduct Prejudicial to the Best Interest of the Service.
Gawas nilang Davide, Magpale ug Tolentino, lakip sa gikiha ni Garcia sa Ombudsman ang WT Construction Incorporated ug usa ka Marissa Anino, nga maoy labaw sa Cebu Lending Center sa DBP.
Sa laing bahin, ang Kapitolyo wala pa gihapon makadawat ug tubag gikan sa WT Construction labot sa ultimatum nga gihatag ni Gob. Garcia alang sa pagpa-abuno sa gikubkob nga yuta sa dapit diin tukoron unta ang CRCP.
Ang Kapitolyo nagtinguha nga mapa-blacklist ang kontraktor kung dili kini mosanong sa tinguha sa Garcia administration nga ibalik sa naandan nga hitsura ug kahimtang ang luna. (AZLG)