PATAY ang tricycle driver sa Sitio Calan, Barangay Poblacion, lungsod sa Cordova, pasado alas 9:00 kagahapon sa buntag, Hulyo 22, human kini pusila sa wala mailhing mga mamumunong luwan sa motorsiklo.
Ang biktima nailhang si Rico Amodia, 39, ug molupyo sa Subabasbas, dakbayan sa Lapu-Lapu.
Si Amodia giingong nagbarogg lang daplin sa dalan duol sa iyang gimanehong tricycle dihang kalit nga miabot ang mga gunman ug dayong pusil kaniya tumong sa iyang ulo.
Nahagba ang biktima dihadiha samtang, dali usab nga misibat ang duha ka mga suspetsado luwan sa motorsiklo nga XRM ug pulos naka helmet ug jacket ug itom.
Matod ni Police Master Sergeant Eliazar Llanes ang imbetigador sa Cordova Police Station nga sa ilang insiyal nga pakisusi posibleng personal grudge ang motibo sa pagpusil patay sa biktima.
Kini human ilang nasuta nga kanunay mangilog ug pasahero ang biktima sa iyang pagpamasahero sanglit dili kini molinya sa ubang mga tricycle nga namasahero.
Laing anggulong gisusi sa kapulisan mao usab ang pagka kanhi drug surrenderer sa biktima sa Lapu-Lapu.
Laing tricycle driver ang gipusil-patay sa Sitio Kulo, Barangay Pajac, Lapu-Lapu, pasado alas 9: sa gabii sa miaging Dominggo, Hulyo 21.
Ang biktima nailhang si Antonio Guilarawan, 50, taga Tanjay City, Negros Oriental apan kasamtangang nagpuyo sa Kagudoy Road, Brgy Basak, Lapu-Lapu.
Si Guilarawan giingong uban ang kapuyo niini nga nagpalit unta og sud-an sa Agora Market dihang kalit nga gipusil usab sa wala mailhing mga suspetsasong luwan usab ug motorsiklo.
Patay usab dihadiha ang biktima samtang ang mga mamumuno dali usab nga misibat palayo sa dapit nga wala gani mamay-ongi ug mamatikdi sa iyang kapuyo.
Matod ni Police Major Miguel Andeza, hepe sa Mactan Police Station, nga naglisod pa sila pagtumbok sa motibo sa pagpusil-patay sa biktima sanglit giingong wala kini kontra sumala sa kapuyo niini. (GCM)