GIDUNGGAB ug gikulata sa duha ka mga silingan ang usa ka lalaki tungod sa init nga panaglalis kalabot na sa away ni Manny Pacquiao ug Keith Thurman niadtong Hulyo 21, adlaw nga Dominggo.
Nidangop sa kapulisan si Somson Dugho, 51, minyo nga taga Zone-3, Barangay Bonbon, human giingong gitabangan sa duha ka mga silingan nga sila si Erecson "Dodong" Jadap, 26, minyo ug Reynaldo "Singkit" Jadap, 58, minyo ug pulos residente sa nahisgutang dapit.
Sa nahipos nga impormasiyon gikan sa kapulisan sa Police Station 4 (PS4) sa Carmen, gikabutyag nga nagkainitay og istorya ang biktima ug mga suspetsado tungod lamang sa away ni Pacman nga nisangpot sa among panghitabo.
Giingong gidunggab og ice pick ni Dodong si Dugho, samtang si Singkit usab ang nagkulata niini ug gibaharan pa kining balikan ug patyon.
Nakaangkon ang biktima og samad sa iyang abaga agi og dinunggaban lakip na bun-og human giingong gisumbag sa nagkadaiyang parte sa kalawasan.
Ang maong insidente ang nakatala na sa buhatan sa kapulisan ug giduso na sa Barangay Lupon alang sa tukmang aksiyon.