PATAY ang usa ka lalaki, samtang samdan ang kauban niini dihang nabanggaan sa naghaguros nga sakyanan niadtong Hulyo 20 mga alas 5:50 sa kadlawon sa Luyong Bonbon, lungsod sa Opol, Misamis Oriental.
Basi sa record sa Opol Police Station, nasuta nga kuyog ang biktima nga si Cosain S. Baulo, 65, minyo, taga Bonbon ug Romeo Tagarda, 59, minyo, dihang nahitabo ang insidente.
Giingong nakatulog ang babayeng driver nga mao si Ryah Ryll Macua, 20, nursing student, taga lungsod sa Laguindingan, ug iyang sakyanan mipaingon sa pikas lane, hinungdan sa pagkabangga sa mga biktima nga giingong sakay sa motorsiklo adtong tungora nga gipanag-iyahan ni Anabelle Montalban.
Gumikan sa grabeng bun-og sa lawas nga naangkon ni Baulo, nakabsan kini sa kinabuhi, samtang ang kauban niining si Tagarda nakaangkon ug mga bun-og sa kalawasan.
Ang driver gikostudya karon sa Opol Police Station kinsa sa pagsulat ning balita, gisuta pa kon aduna bay settlement nga mahitabo.