Sekyu gipatay sa tulisan, kahera nga buros naangol

CAGAYAN DE ORO. Usa sa duha ka mga suspek sa nahitabong pagpanulis sa Phoenix Gasoline Station sa lungsod sa Villanueva Misamis Oriental ug pagpatay sa sekyu nasikop sa gipahigayon nga hot pursuit operation. Ang duha mag-atubang og ubay-ubay ka mga kaso. (Misamis Oriental Provincial Police Office)
CAGAYAN DE ORO. Usa sa duha ka mga suspek sa nahitabong pagpanulis sa Phoenix Gasoline Station sa lungsod sa Villanueva Misamis Oriental ug pagpatay sa sekyu nasikop sa gipahigayon nga hot pursuit operation. Ang duha mag-atubang og ubay-ubay ka mga kaso. (Misamis Oriental Provincial Police Office)



DUHA ka hugna sa pagpanulis ang natigayon kon asa ang unang tulis sa gasoline station gipatay ang bantay nga security guard, samtang gipusil ang kaherang mabdos diha sa Phoenix Gasoline Station, Barangay Tambobong Villanueva, Misamis Oriental.

Nahitabo ang tulis sa gasoline station mga 3:30 sa kadlawon adlawng Dominggo ug gisundan sa 7 Eleven sa Bugo, siyudad sa Cagayan de Oro.

Sa inisyal nga imbestigasyon sa Villanueva Police Station, nasuta nga unang nagpatuong kostumer ang mga suspek ug samtang nag-akbo sa bangko kay nakatagpilaw ang sekyu nga giilang si Dominico Servandel, 22, taga lungsod sa Balingasag, Misamis Oriental, sakop sa Lux Enterna Agency kalit kining gipusil sa mga suspek, hinungdan sa iyang hinanaling kamatayon.

Gidoulan sab ang cashier nga giilang si Axcel Rose Gemino, 25, minyo, taga Katipunan sa susamang lungsod, mabdos ug gipusil sa apapangig, hinungdan sa pagkaligid niini. Giingong nagpapatay-patay nalang kini aron dili tiwasan sa mga suspek.

Gilimas dayon sa mga tulisan ang kwarta nga halin nga anaa sa kaha ug daling misibat sakay sa motorsiklo.

Giingong nipaingon na sab ang mga suspek sa 7 Eleven convenience store sa Barangay Bugo kon asa wala milampos human nababagan sa sekyu.

Ang kahera giobserbahan karon panahona sa Northern Mindanao Medical Center.

Tungod sa sunod-sunod nga pagpanulis mga alas 4:00 sa kadlawon, milusad og hot pursuit operation ang hiniusang pwersa sa kapolisan pangulohan ni Police Major Rogelio Velasquez Manalang, hepe sa Villanueva Police Station; Police Lieutenant Jules King Litanon, deputy chief; ug Police Lieutenant Colonel Espiridion Biado III, hepe sa Provincial Intelligence Branch; PMFC pangulohan ni Police Major Rogelio Labor ug Police Station 6 sa Puerto Maria Mantala Jr.

Ang operasyon miresulta sa pagkasikop sa gitumbok nga mga suspetsado sa pagpanulis nga mao sila si Reymark Jay Pumatong Villa, 27, taga Bugo, Cagayan de Oro City, ug Bernie Belen Doldol, 28, ulitawo taga Sta. Cruz Tagoloan, Misamis Oriental.

Nakumpiska sa posisyon ni Villa ang usa ka 9mm nga kalibre nga dunay magazine nga puno sa unom ka buhing bala, usa ka shotgun ug patrol shooters marking.

Nasakmit sab gikan kang Doldol ang mokabat P13,920 nga kantidad ug usa ka unit sa Rusi nga motorsiklo.

Si Police Colonel Robert Roy Bahian, director sa Misamis Oriental Provincial Police Office, niingon nga si Pumatong usa ka head guard ug ilang kauban ang napatay nga si Seevandel.

Gitouhang ila kining gipatay tungod kay nakaila kini kanila.

"Ang ilang gipusil kauban ra sa security agency nilahos sila sa 7 Eleven nanulis pod, nibalik sa Limketkai warehouse, nang-hostage. Gikuha niya ang shotgun sa security na operate nato ug napa-surender," matud ni Bahian.

"Gapalusot lang nga nakainom lang nablanko pero ato paning giimbestigar, i-drug test ug tan-awon nato unsay resulta," dugang niini.

Ang mga dinakpan mirason nga nahimo ang pagpanulis gumikan sa kalisod ug kakulang sa sweldo tungod sa daghang kaltas.

Ang kaipon ni Pumatong niingon nga posibleng nahimo lang sa iyang kaipon ang krimen tungod sa pinansyal nga problema.

Gani sa wala pa nahitabo mga alas 8:00 sa gabii, nananghid kining moadto sa inahan niini sa Bugo. Dili sab kini makatuo nga nahimo sa iyang bana.

"Sa pagkakaron, di ko pakatoo mahimo niya to nga krimen kay bisan kinsa pasultihon, nakaila niya boutan ako kaipon," matud niini.

Ang mga suspek detinado na karon sa Villanueva Police Station kinsa mag-atubang og patong-patong nga kaso.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph