UNOM ka mga tawo ang nangamatay sa mga Dakbayan sa Talisay ug Lapu-Lapu.
Tulo ang patay sa buy-bust sa kapulisan samtang ang laing tulo gipamusil patay sa wa mailhing mga tawo.
Tulo ka gikatahapang mga durugista namatay human giingong nakigpinusilay sa kapulisan atol sa buy-bust operation sa sitio San Lucas, Brgy Biasong, syudad sa Talisay.
Giila ang tulo nga sila Vernabe Suello, Julie Daugdaug ug igsuon nga si Anisito. Si Julie ang subject sa buy-bust.
Matod sa kapulisan sa Talisay City Police Station nga nakadawat sila og taho kalabot sa grabe ug lantaran nga pagpamaligya og ilegal nga drugas sa maong lugar.
Gipaubos kini sud sa pipila ka adlaw nga surveillance ug Huwebes sa alas 4:40 sa hapon, Hulyo 25, gihimo ang buy-bust batok kang Julie.
Sa dihang tunga-tunga sa transaction giingon nga nakamatikud ang tulo ug namusil sa mga pulis.
Nahitabo ang pinusilay tali sa duha ka mga grupo.
Nangaigo ang tulo ug gidala sa tambalanan, apan gideklarar nga puro dead on arrival.
Sa pagsuwat ning taho, padayon pa ang inventory sa illegal drugs.
Bata-bata
Sa Huwebes sa buntag, Hulyo 25, lalake nga gitumbok nga sinaligan sa usa ka drug lord napalgang patay sa sitio Ilang-Ilang, Barangay Lagtang, Dakbayan sa Talisay.
Ang biktima giila nga si Jimbo Gadiano, 33, minyo, napalgan nga nag-ubo, duha ka mga kamot ang ginapos gamit ang itom nga liston sa sapatos. Giila siya sa iyang manghud nga si Jay-r.
Pasado alas 4 sa kaadlawon, adunay nadunggan nga mga buto-buto sa armas ang mga residente sa maong dapit.
Sa gihimo nga pakisusi sa kapulisan, ilang nasuta nga mamaligyaay og ilegal nga drugas si Gadiano ubos sa napatay nga drug lord nga si Girlie Luage.
Si Luage napatay sa operasyon sa Provincial Intelligence Branch niadtong’ Abril 29 ning tuiga gitudlo nga sinaligan sa kanhi drug Lord nga Steve Go.
Matod ni Police Major Orlando Carag Jr., si Gadiano sinaligan ni Luage sa pag-dispose sa mga shabu.
Hayan ang nipatay kang Gadiano ug kang Jerusalem Berbo niadtong Hulyo 12 sa gabii sa Cansojong, hayan usa ra.
Apan ang igsuon ni Gadiano di makatuo nga nalambigit sa drugas ang maguwang.
Hinuon iyang giangkon nga mogamitay og ginadiling drugas ang biktima
Lapu-Lapu
Patay diha diha dayon ang usa ka ex-convict human pusila sa wala mailhing mamumuno pasado alas 11 sa udto Hulyo 25 sa Sitio Pool, Brgy Bankal, Dakbayan sa Lapu-Lapu.
Ang biktima giilang si Richard Malingin Inot, 30, lumolupyo ra usab sa lugar.
Si Inot nakaangkon og samad pinusilan sa nagkadaiyang bahin sa lawas.
Matod ni Police Major Jaime Tolentino, hepe sa Pusok Police Station sa Lapu-Lapu City Police Office, si Inot diha sa iyang barbekyuhan dihang miabot ang mga mamumuno.
“Lain-lain ang estorya naay nag-ingon nag motor. Naa say nag-ingon naglakaw mao amoa pa nga gi follow-up gyud og unsa,” matod ni Tolentino.
Si Inot giingong nakagawas sa New Bilibid Prison sa Muntinlupa duha ka buwan lang ang nakalabay tungod sa kasong robbery.
Samtang pasado alas 11 sa Miyerkules sa gabii, Hulyo 24, 35-anyos nga lalake gipusil patay sa wala mailhing mamumuno sa Sitio Datag, Brgy. Maribago.
Ang biktima giilang si Ryan Lawaan Ponce, kinsa nakaaangkon og samad pinusilan sa iyang ulo hinungdan sa iyang hinanali nga kamatayon.