MGA tag-iya og sakyanan nga naa gi-park sa mga karsada sa Dakbayan sa Talisay angay nang magbantay.
Ipatuman na sa City of Talisay-Traffic Operation Development Authority (CC-TODA) ang clamping ordinance sa siyudad.
Human sa estrikto nga pagpatuman sa no helmet, no ride, isunod nila ang pagpatuman sa clamping.
Gipahibawo ni Jonathan Tumulak, pangulo sa CT-TODA, nga sulod ning semanaha, hugot na usab nila nga ipatuman ang clamping ordinance nga niadto pang 2012 napasar.
Matod ni Tumulak nga pagtubag sa mga reklamo nga adunay mga illegally parked nga mga sakyanan sa mga national highway.
Pagsunod usab kini sa mensahe ni Presidente Rodrigo Duterte sa iyang State of the Nation Address (Sona) niadtong Lunes, Hulyo 22, nga hingusgan ang kampanya batok sa illegally parked vehicles nga maoy sagad hinungdan sa paghuot sa trapiko sa kadalanan.
“Kining mga illegally parked vehicle mao sad ni ang mga naka-contribute sa traffic. Mohinay ang flow sa mga sakyanan, tungod sa mga sakyanan nga naka-park daplin sa da’n. Once clear lang ang dan, dili ma-obstruct ang traffic flow,” pagpasabot ni Tumulak sa Superbalita Cebu.
Gisugdan sa Martes sa buntag ang paghingusog sa pagpahibawo kalabot sa strikto nga pagpatuman sa ordinansa.
Ilang girumbo sa Martes sa buntag hangtud sa hapon ang mga boundary sa Talisay City ug lungsod sa Minglanilla.
Giadto usab nila ang Barangay Bulacao, nga boundary sa Siyudad sa Talisay ug Cebu city ug sa may South Coastal Road.
Ang no parking sa mga national highway usa ka nasudnong balaud ug nalatid usab kini sa city ordinance sa Talisay City.
Target sa clamping ang mga nagpa-carwash, nagpa-vulcate, nangaon sa mga kan-anan kilid sa highway, nanghunong nga sakyanan sa national road kay adunay gipalit sa mga tindahan kilid sa dalan.
Ang mga masakpan nga nag-illegally parked ma-isyuhan og citation nga magbayad og multa nga P500 ug laing P500 kon maklaman na.
Sa no helmet, no ride campaign, gatusan na ang nadakpan nga mga nagmotorsiklo.