Mga basura sa South Korea gipangawat

GI-IMBESTIGAHAN karon ang 30 ka mga indibidwal human nasapon nga nanguha og mga basura gikan sa South Korea nga anaa sulod sa Verde Soco Compound sa Barangay Sta. Cruz, lungsod sa Tagoloan, Misamis Oriental.

Gikwestyon sa kapulisan sa Tagoloan Police Station ang mga nasapon nga sila si Alex Medio , 25; Arlon Gamayan, 39; Marlito Bunghanoy, 22; Dodong Palak, 37; Almer Enrequiz, 27; Rosalyn Edoria, 27; Christopher Lamantucan, 36; Resie Minester, 30; Dennies Montero, 27; Dodong Apoya, 23; Wella Lagrada, 37; Belen Siguay, 24; Melania Agustin, 20; Jenefer Cape, 40; Alvin Loretero, 23; Rosana Medio, 26; Maricel Mabale, 30; Nimpa Sadlawan, 58; Jimmy Edoria, 33; Cerilena Mial, 64; Caren Manrawat, 40; Dian Ramos, 20; Gloria Ayoman, 36; Ronald Mabanta, 48; Manrawat Ferdinand, 40; Garry Mial, 30; Freddie Almeral, 36; Jun-Jun Palarin, 28; Caren Galas, 44; ug Elmor Sabit; 48.

Sa inisyal nga imbestigasyon, nasuta nga pasado ala 1:50 sa hapon niadtong Hulyo 18 nanghangyo og police assistance si Mohon barangay captain Jerson Sabia human ilang nadawat ang report nga ubay-ubay ang misulod sa compound sa Verde Soco.

Lakip sa miresponde si Tagoloan Mayor Gomer Sabia ug ilang nasapon sa akto kining mga indibidwal nga pasakay na sa sakyanan ug sa tulo ka motorsiklo nga pulos puno sa basura nga gikan sa compound sa Verde Soco.

Dihang gipangutana kini sa mayor, matud nila nga sila mga residente sa landfill, Zayas, Siyudad sa Cagayan de Oro ug ilang giingon nga mokolekta sila og basura sama sa plastic ug recyclable materials aron ibaligya sa junkshop.

Ang driver sab nga si Ferdinand Sarhento niingon nga duha ka semana ang milabay adunay misulti kanila nga pwede ra sila mokuha og basura sa Verde Soco ug daw ila sab kining nadungog nga pwede sila manguha og basura sulod sa compound.

Ang duha ka barangay tanod nga nagbantay sa dapit niingong nagsige na sila og badlong sa maong mga tawo.

Sa pagkakaron, gi-hold sa kapulisan ang 30 ka mga indibidwal alang sa dugang imbestigasyon.

Kahinumduman nga ang mga basura anaa na sa kostudya sa Bureau Of Custom human gipasakaan og kasong kasupakan sa Section 13 sa Repulic Act No. 6969 ang tag-iya ug management sa Verde Soco tungod sa pagdala sa mga basura gikan sa South Korea.

Gawas niini dili kini mahimong kuhaon bisan kinsa tungod kay gikatakda kining ibalik sa terminal aron mahatod balik sa South Korea.