GIKALIPAY sa Regulatory and Complaint Board (RCB) ang pagpatuman sa liquor ban kini human gilakbitan ni Presidente Rodrigo Duterte sa iyang State of Nation Address (Sona) niadtong Lunes, Hulyo 22.
Gibutyag ni Duterte nga ang liquor ban alang sa tanan ug nagtuo nga angayang kining ipatuman.
“A national law, para lahat na, at 12 o’clock everything closes. I think that we should adopt it. You have to stop drinking, and jukebox reduced to 8 or 9,” pahayag ni Duterte.
Gibutyag ni Antonio Resma Jr., inspectorate team leader sa RCB, nga gikalipay nila ang paglakbit mismo sa presidente atol sa Sona ilabi na nga dili lamang kini lokal nga isyu kundili sa nasyonal.
Giingong dako kaayo kini nga problema sa komunidad dili lamang sa menor de edad nga imbes motungha anaa na diha sa mga imnanan.
Daghan usab aksidente sa kadalanan ilabi na kun magmaneho nga nakainom diin sagad nadisgrasya.
Problema usab kini sa matag pamilya nga mag-away panahon nga lango sa ilimnong makahubog ang bana.
Gidugang pa nga andam usab ang mga chairman sa mga komitiba nga motabang ug mosuporta nga maduso kini sa konseho.
“M-submit nato sa City Council, ma-aprobahan, ma-consider nila, ma approved pud ni Mayor i-implement dayon nato diretso, gwapo na nga target nato within the year,” matud ni Resma.
Konsultahon pa usab ang mga negosyante ug uban pa aron nga mahan-ay og hingpit nga mapatuman sa siyudad ang liquor ban.
Gipasabot usab kanunay sa RCB nga dili sila anti-business ug gani maghatag pa usab sila og panahon aron nga mapaabot sa mga patigayon ilabi na kun hingpit na nga mapatuman kining iduso nga ordinansa.
“Again dili man lage anti-business ang RCB kun dili for regulation lang man ta, di sab ta gusto nga diretso ta mangdakop, diretso magpenalty, ang ato magsinabtanay ta pag-impose ani nga balaodnon puhon,” dugang pa.