TULO ang giingong non-compliant sa pagpatuman sa “No segregation, No collection” Policy sa Barangay 1 ngadto sa Barangay 40, Siyudad sa Cagayan de Oro.
Anaa sa siyento porsyento ang ubang mga barangay samtang daghan na usab ang anaa sa 95 porsyento samtang tulo ang adunay pinakaubos.
Gibutyag ni engineer Armen Cuenca, pangulo sa City Local Environment and Natural Resources Office (Clenro), nga maayo ang resulta tungod kay daghan na usab ang nagpatuman niini.
“Maayo ang resulta sa atong ‘No segregation, No collection’ naa nay daghan nga mga barangay nga naka 100 percent compliant,” matud ni Cuenca.
Gidugang pa niini nga naay tulo nalang ang pinakaubos nga prosyento.
“Naa nalang tulo ka barangay nga pinakaubos naay 75 percent, 80 percent ug 85 percent, the rest is above 95 percent na,” dugang ni Cuenca.
Nasayran nga nagsugod na og pagpahamtang og multa sa mga nakalapas niini sugod niadtong Hulyo 16 ning tuiga.