BISAN paman og susama ra kini sa 1994 nga animated musical, daghan gihapon ang nilinya kay gusto nga motan-aw kon giunsa sa direktor niini nga si Jon Favreau ang photorealistic computer - animated musical film nga “The Lion King” karong 2019.
Childhood memories, mao ni ang sagad sa masulti sa nanan-aw kinsa dili lang ang millenials, apan lakip ang mga ginikanan nga bitbit ang mga anak.
Ang “The Lion King”, nagtuyok kini sa estorya ni Simba, kinsa mao ang sumosunod nga hari sa animal kingdom sa Pride Lands.
Naaksidente ang iyang amahan nga si Mufasa ug namatay. Subay diay ang kamatayon ni Mufasa sa plano ni Scar (igsuon ni Mufasa ug uyoan ni Simba) aron siya ang mopuli sa trono isip hari.
Usa sa giduol ni Scar ang mga Hyena aron matuman ang iyang plano.
Tuod man gi-brainwash niini ang bata nga Simba ug nipalayo kini sa Pride Lands. Didto niya naila-ila ang bestfriends nga sila si Pumba ug si Timon.
Kon star-studded ang 1994 film, wala usab giang- ang sa Disney ang remake sa “The Lion King”.
Si Donald Glover ang nidala sa tingog ni Simba, samtang si Beyonce Knowles-Carter mao ang nidala sa tingog ni Nala, ang love interest ni Simba.
Nagpabilin usab nga si James Earl Jones ang tingog nga nidala kang Mufasa.
Gawas sa gihimo kining kataw-awan, light ra usab ang dagan sa maong salida, susama sa unang “The Lion King”.
Aduna la’y gamay nga giilis ang direktor diin gihimo niining realistic ang mga panghitabo.
Gawas sa mga bag-ong tingog, aduna sa’y album nga gihimo ang singer nga si Beyonce alang sa maong salida isip halad niini sa kontinente nga Africa, nga mao’y setting sa salida.
Anaa na karon sa ikaduhang semana sa sinehan ang “The Lion King” ug tuod man kon na-in love ka sa unang cartoon movie niini, mas ma-in love ka sa remake.
Di gyud mopakyas ang Disney sa ilang mga remake sa ilang mga cartoon movies nga ubay-ubay na.