ANG Davao City Pirates nga gibanderahan sa mga inilang magduduwa nabutang nga runner-up human miyukbo sa Philippine Air Force, 3-8, sa 2nd Tadeco Softball Tournament Mindanao Open nga nahuman, Dominggo sa Tadeco field sa Panabo City.
Ang Pirates, suma sa magduduwang si Vincent Ryan Sarabia, nga naglisud sila sa finals kontra PAF squad.
“Kusog kaayo mamalo, mas praktisado sila kaysa sa amoa,” ni Sarabia, nga maoy coach sa University of Mindanao (UM) baseball team, sa Facebook interview.
Ang PAF mipildi sab sa Davao City Pirates, 12-1, sa semifinals game, apan mibawi ang uwahi, human gipildi ang BXU Yankees, 10-2, sa playoff aron maka-abante sa finals.
Ang BXU Yankees una ng mipildi sa Matatag Logistics sa Butuan City, 3-2, sa semifinals game.
Ang mga Dabawenyos mipildi sab sa ubang tim Tagum City, 6-5, Matatag Logistics, 5-0, Chatbals sa Misamis Oriental, 6-4.
Ang PAF, sa ilang parte, miasdang sa championship match nga way pildi sa upat ka duwa.
Ang tim Davao gilangkuban nila Severino Miras Jr., Romeo Garaygay Jr., Edmer Del Socorro, Denver Largo, Rich Field Custodio, Emmanuel Vinoya, Edgardo Baniog Jr., Jorge Madaje Jr., Jayson Acuña, Paul Juson, Paul John Juson, Jester Dave Mansalayao ug Mark Dave Avenido.