GILUBAT-LUBATAN karon ang kalag sa mga tawo nga naanad sa ilang kinabuhi nga haruhay tungod sa ilegal nga druga ug pagpangawkaw sa salapi sa gobyerno human giluwatan ni Pangulong Rodrigo Duterte nga buot niyang buhion pag-usab ang death penalty.
Sa iyang ika-upat nga State of the Nation Address niadtong Lunes sa gabii, Hulyo 22, buot niyang madali ang death penalty alang sa heinous crimes labot illegal drugs ug plunder.
Ambot lang sab kung mahadlok ba ang mga tawo nga nalambigit sa ilegal nga negusyo sa druga niining death penalty nga wa man gani nahadlok sa vigilante killings?
Ang pag-apil sa kasong plunder, sa akong nakita, mahadlok na ang mga politiko nga mangawkaw sa dakong kantidad kay basin masilotan sila sa kamatayon.
Hinuon, nasayud na sila kung unsa ang himuon aron di makasohan og plunder nga gihingusgan nila Senador Christopher Go ug Senador Ronald dela Rosa.
Kung gipaningot ang mga dautang tawo, nagmaya sab karon ang mga opisyales sa barangay ug Sangguniang Kabataan tungod kay buot sa Presidente nga himuon kini sa 2020.
Giduso sab ang Magna Carta for Barangays nga magdeklara sa mga opisyales sa barangay nga regular nga opisyales sa gobyerno ug hatagan sila og gahum sa pagpalambo sa paghatud sa serbisyo sa gobyerno.
Buot sab sa Pangulo nga ipasa ang Tax Reform for Attracting Better and High-Quality Opportunities (Trabaho) bill nga nagtinguha sa pagpakubos sa corporate income tax rate ngadto sa 20 porsyento.
Dugang pa niini, giyawyawan sab sa pangulo ang mga ahensya sa gobyerno sama sa Bureau of Customs, Land Bank of the Philippines, ug daghan pa tungod sa di episiyente nga serbisyo.
Subli nga gipadungog sa Pangulo nga di siya motugot sa kurapsyon mao nga giawhag niya ang katawhan nga moreklamo. Pero, mas nindot nga naa gyuy tukuron ang Pangulo nga grupo ang trabaho maoy maniid ug modakop pinaagi sa entrapment sa mga kurap nga opisyal sa gobyerno.
++++
Akong ipadangat ang pagtimbaya sa SunStar Davao Superbalita nga nagsaulog sa ilang 20th Founding Anniversary. Mabuhay ang Super B!