WALA na kaipsot ang usa ka lalaki kinsa gironda sa mga sakop sa Davao City Field Unit (DCFU) sa Criminal Investigation and Detection Group (CIDG) Davao alas 6 sa gabii, Lunes, Hulyo 22, sa Barangay San Antonio, Agdao District, Davao City.
Ang suspek giila ni DCFU chief Police Major Milgrace Cajes Driz, uban sa Sta. Ana Police Station, nga si Leonel John Leopardos Piyaw, alyas Dodong, hamtong ang pangedaron, nagpuyo sa dapit.
Nakuha sa posisyon sa dinakpan ang duha ka .38 nga revolver nga dunay mga buhing bala.
Sumala sa kapulisan nga resulta kini sa search warrant nga gi-issue ni Hon. Emmanuel Carpio, executive judge, RTC Branch 16, sa dakbayan sa Davao.
Giingong gireklamo ang suspek sa nagpakabana nga katawhan gumikan sa pagkupot niini og mga armas.
Ang suspek, pasakaan og kasong pagsupak sa kalapasan sa Republic Act 10591 kon Comprehensive Firearms and Ammunition Regulation Act.
Kasohan sab ang usa ka Emma Martinez Ignacio kinsa giingong mibabag atol sa pagdakop kang Leopardos.
Mga suspek anaa gibalhog sa selda sa Sta. Ana Police Station. (Jeepy P. Compio)