CAMP SGT. QUINTIN MERECIDO -- Nakadakop na sab ang Police Regional Office-Davao og laing high-value target (HVT) nga drug personality atol sa gilusad nga anti-drug operation sa kapulisan.
Ang suspek si Emmanuel Maghanoy Lalican, alyas Emoc, 34-anyos, kanhi prison guard 1 sa Dapecol ug residente sa Purok 11, Barangay 31-D, Roxas Boulevard, Davao City.
Alas 9:15 sa gabii niadtong Lunes, Hulyo 22, ang drug enforcement team sa Talomo Police Station nagpahigayon og drug bust uban sa PDEA-Davao didto Purok 11.
Malampusong nasikop ang suspek dihang nagpositibo ang iyang pagtunol og shabu bugti sa kuwarta ngadto sa nagtakuban nga pulis.
Narekober gikan sa posisyon sa dinakpan ang 32 ka pakite sa gituohang shabu nga dunay street value nga P600 mil, marked money, selpon, mga IDs ug kuwarta nga mokantidad sa P7,000.
“Suspect is considered as high-value target (HVT) and under PNP drug watchlist and his arrest is the result of the intensified campaign against illegal drugs,” sulti sa director sa PRO-Davao Brigadier General Marcelo Morales.
Kasong pagsupak sa Republic Act 9165 kun Comprehensive Dangerous Drugs Act of 2002 ang ipasaka nga kaso batok sa suspek didto sa korte.