JARO, Leyte--Wa pa matino sa kapulisan ang motibo ug kinsay target sa ambush nga nakaangol sa usa ka barangay kapitan ug kaubanan niadtong Dominggo sa gabii, Hulyo 21.
Matod sa Jaro police, di pa nila matino kinsa ang target sa pagpamusil nga niangol kanila ni Barangay Kapitan Estrella Geraldo, 62, sa Barangay San Pedro, Tunga Leyte; Leopoldo Po, driver; Ailen Po, maestra; ug Rachel Cuña, 27.
Mga biktima naa sa usa ka sakyanan dihang gipangrakrakan.
Wa maunsa sila si Wilfredo Gerlado ug ang duha ka kaubang mga bata nga nag-edad og 6 ug 4 anyos.
Ang kapulisan sa Jaro dali nga miadto sa Barangay Hibucawan di nahitabo ang insidente.
Sa pagsusi ni Police Senior Master Sergeant Ronald Pedrique, gidala na sa tambalanan sa Tacloban ang mga biktima.
Sa inisyal nga imbestigasyon, gikan sa Tacloban pauli sa Tunga, Leyte ang mga biktima sakay sa usa ka Suzuki Ertega.
Pag abot sa Hibucawan, gigukod sila og laing sakyanan diin sakay ang mga gunman dayon namusil. Naigo sa ulo si Leopoldo ug si Ailen.
Naigo usab sa likod sa ilang lawas ang kapitana ug si Cuña.
Hinuon, way nangamatay sa mga biktimang nangaangol.
Pipila ka basiyo sa wa matino nga kalibre sa armas ang nakuha sa crime scene ug gidala sa Crime Laboratory. (JKDP)