USA ka 16 anyos nga babaye ang niambak sa Marcelo Fernan Bridge, habig sa Barangay Umapad sa dakbayan sa Mandaue niadtong Martes, Hulyo 23, 2019.
Unang nakita sa CCTV camera sa taytayan ang babaye ug dali kini nga girespondehan sa kapulisan apan uwahi na ang tanan kay nakaambak na kini.
Matod pa, ang mga mananagat nga didto sa maong dapit ang miluwas sa dalagita ug dali kini nga gidala sa Mandaue District Hospital.
Saysay sa kapulisan nga conscious apan naglisod pa pag-istorya ang babaye.
Sa unang pakisusi, gituohan nga duna kini bug-at nga problema nga posibleng dunay kalabutan sa gugma ang rason sa pagsuway sa pagkutlo sa iyang kinabuhi.
Nakita sa kapulisan ang tuo nga bukton niini nga dunay dagkong laslas, samtang ang wala daghan usab og agia sa mga linaslasan.
Atol sa iyang pag-ambak nagsul-ob kini ug puti nga sando ug itom nga karsones. (ANV)