GIKATAKDANG ipaubos usab sa re-blocking ang dapit nasunogan sa Sitio Tacan, Brgy Ibo, dakbayan sa Lapu-Lapu nga naigo sa laing sunog sa maong siyudad sa milabayng Dominggo
Moabot ngadto sa 223 ka pamilya ug 672 ka mga indibidwal ang nawagtangan ug pinuy-anan sa maong sunog nga miulbo sa tungang gabii.
Nunot niini gikataho nga makapabarog gihapon ang mga biktima og balik sa ilang mga pinuy-anan sa maong dapit. Kini taliwala sa kabalaka nga posibleng gamiton ang maong luna sa nanag-iya niini.
Si Lapu-Lapu City Mayor Junard “Ahing” Chan dihang nahinabi ning mantalaan, mipasalig nga iyang hangyuon ang tag-iya sa luna ug temporaryong patukoron og balik ang mga nasunogan sanglit wala pay relocation site nga matagana ang local nga kagamhanan sa dakbayan alang sa mga nabiktima. Giingong ang luna iya sa Mactan Cebu International Airport (MCIA).
Gibutyag usab ni Chan nga mohatag siya og financial assistance sa mga nasunogan, lakip na ang personal nga P100,000 nga alang sa pagkaon. Nasayran ni Chan nga kuwang kaayo og pundo ang barangay sa pag-atiman dayon sa mga nasunogan partikular na ang pagpang apod-apod og pagkaon.
“Manghangyo sa ta nga mo-stay sila diha. Unya mao nay ato gitutokan nga posible ang naa sa dagat (dapit) ato man gyud na gipaningkamotan nga malimpyo aron masud nato sila inig re-blocking. Ato bahin-bahinon na lang ang yuta nga available basta ang katong nagpaabang o nag negosyo ug paabangan maoy posible ma-displaced,” matod ni Chan.
Giawhag usab ni Chan ang Lapu-Lapu City Fire District sa pag- imbestigar sa sunod-sunod nga sunog sa dakbayan sa milabayng duha ka semana.
Kagahapon sa udto usa ka payag na usab nga adunay mga butane ang naugdaw sa sunog nga miulbo usab sa Soong Center, Brgy. Mactan.
Ang alarma nadawat sa kabomberohan alas 12:02 sa udto.
Wala hinuon makalamoy sa laing mga balay ang kayo tungod kay may igong distansya man kini gikan sa residential area.
Matod ni SFO2 Climaco Salidsid ang imbestigador sa Lapu-Lapu City Fire District nga ang naasoyng payag gipanag-iya nila ni Lydia ug Michael Cabugatan. Mokabat lang og P2,000 nga danyos niini.
Posibleng ang leakage sa butane ang hinungdan sa pag-ulbo sa sunog.
“Naa ni silay refilling station layo sa maong dapit unya gi-raid mga duha ka semana mao nang nisibat ni sila unya katong wala ma confiscate didto nila gibutang sa quarters (ang nasunog) sa ilang mga tawo, unya gibiyaan sad kay na raid na lage mao gipasagdan na lang pero dili gyud matawag nga storage to nga shanty (payag),” matod ni Salidsid. (GCM)