ANG Cebu City Government pinaagi sa panaghugpong sa Bantay Dagat, Market Operation Division, City Environment and Natural Resources ug Maritime Police nipahigayon og market denial didto sa Pasil Fish Market para dili makasulod ang mga pinabuthang isda.
Ang grupo nga gipangulohan ni Ariel Yburan sa Bantay Dagat nakasakmit og 11 ka kahon nga adunay sulod nga lainlaing isda nga pinabuthan gikan sa Zamboanga City sa niaging adaw.
Ang maong mga box walay pangalan sa consignee o tindera nga maoy nidawat sa maong mga isda nga nakasulod sa fish market apan wala pa ma-display.
Atol sa pagsusi ni PO3 Temestocles Ambus, kinsa usa usab ka accredited fish examiner, nasuta nga pinabuthan ang maong mga isda tungod kay nagusbat na ang ginhawaan niini.
Base sa dokumento nga ilang nakuha ang mga isda uban sa barakoda, mamsa ug uban pa gipanag-iyan sa Fardiya Fishing sa Zamboanga.
Niabot og 330 ka kilo nga mobalor og P82,000 ang kantidad sa isda nga ilang nasakmit. Kini i-donate ngadto sa mga charitable institution nga accredited sa dakbayan.
Kini maoy ika-upat nga positibong operasyon sa Bantay Dagat. Una ang 160 kilos, ikaduha ang 200 kilos, ikatulo ang 600 kilos.
Lakip sa gihatagan mao ang Franciscan Missionaries of Mary, Franciscan Sister of Sacred Heart Childrens Home ug Gasa sa Gugma.
Si Yburan niawhag ngadto sa mga mananagat nga mokuha og mga isda sa kadagatan sa legal nga paagi ug dili mogamit og dinamita ug ubang klase sa paboto sanglit supak kini balaod ug madaot ang marine sanctuary diin nabuhi ang mga produkto gikan sa kadagatan. (PAC)