SECTIONS
Friday, August 23, 2019
SUPERBALITA CEBU

Sa Central Visayas: Cebu City nag-una sa kasong dengue

KAMPANYA BATOK DENGUE: Ning pagsulod sa bulan sa ting-uwan, subsub karon ang kampanya sa Department of Health batok sa pagkatap sa sakit nga dengue ilabi na sa Central Visayas. Ang mga bata, sama niining anaa sa hulagway, maoy sagad ug bantang nga maigo niini hinungdan nga giawhag usab ang mga ginikanan sa hugot nga pagsuporta sa kampanya batok dengue. (File Photo)

TUNGOD sa sunod-sunod nga kaso sa dengue, 13 ka mga barangay ang gimonitor karon sa Department of Health (DOH) 7.

Ang 13 ka barangay gikan sa nag-unang dakbayan sa kinatibuk-ang bahin sa Sugbo.

Sa Cebu City, siyam ka mga barangay ang gimonitor, laing tulo sa dakbayan sa Lapu-Lapu ug usa sa dakbayan sa Mandaue.

Lakip sa gimonitor karon sa siyudad sa Sugbo ang Barangay Apas, Guadalupe, Pit-os, Basak-San Nicolas, Lahug, Camputhaw, Mambaling, Bonbon ug Bacayan.

Samtang sa dakbayan sa Lapu-Lapu mao ang mga Barangay sa Looc, Basak, ug Babag, ug Barangay Banilad sa dakbayan sa Mandaue.

Matod ni Dr. Shelbay Blanco, ang pangu sa Regional Epidemiology Surveillance Unit (RESU) 7, nga sa mga nahisgutang barangay nag-cluster o nagsunod-sunod ang nangaigo sa dengue.

Nasayran nga sa Barangay Guadalupe ug Camputhaw, aduna’y semana nga tag-unom ka kaso sa dengue ang natala.

Ang dakbayan sa Sugbo maoy labing daghang kaso sa mga local government unit (LGU) sa Central Visayas. Kini adunay 1,396 ka kaso ug 10 ang natala nga patay sukad sa Enero hangtod Hulyo ning tuiga. Sa niaging tuig mitala kini og 992 ka kaso ug unom ang patay.

Gisundan kini sa dakbayan sa Lapu-Lapu nga niabot og 641 ka kaso ug duha ang patay karong tuiga. Sa niaging tuig, aduna kini 473 ka mga kaso ug duha ang patay.

Ikatulo mao ang dakbayan sa Mandaue nga may 430 ka kaso ug tulo ang patay karong tuiga samtang 268 sa niaging tuig apan walay patay.

Usa sa gihimo karon sa mga barangay mao ang pag-activate sa Barangay Dengue Brigades ug ang nagkadaiyang Dengue Task Force aron malikayan nga magpadayon pa ang pagsaka sa kaso.

Lukop rehiyon anaa na sa 9,990 ka kaso ang Central Visayas ug 65 ang patay, diin moabot ngadto sa 139% ang pagsaka kon itandi niadtong 2018 nga may 4,185 ka kaso ug 25 ang patay.

Sa tanang lalawigan sa tibuok nasod, ang Sugbo natala nga aduna’y labing daghang kaso sa Dengue. (HBL)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph