KINI maoy nahitabo ni Renante Otero, taga Barangay San Isidro siyudad sa Talisay, nga nagbitay sa tulay human gi-salvage ug gipatay.
Si Otero, giingon nga nailhan nga tulisan, kawatan ug nalambigit sa kalihukan sa ilegal nga drugas.
Grabi ang kasuko sa mga tawo nga naghimo sa krimen. Tiaw moy gibitay ang biktima ug gibutangan ug karatola “ TULISAN KO UG AYAW KO NINYO SUNDA”.
Kon imong basahon pag-ayo ang paagi sa pagpatay, dili kini binuhatan sa mga ordinaryong kriminal.
Apan bisan paman niini daghan sa mga tawo ang malipay sa paghipos pinaagi sa pagpatay sa mga sagbot sa katilingban.
Sama sa nahitabo ni Otero nga magsud-gawas sa prisuhan. Human mapriso kon makagawas maghimo nasab og krimen.
Danao City
Dunay nagpahibawo kanako nga aduna nay FB PAGE ang Danao City Government.
Ako dayon nga giitan-aw aron masayran ang mga kalihukan sa among siyudad.
Akong nakita mao ang pagpahibawo sa mga proyekto nga nahimo ug umaabot pa nga mga programa.
Ang Danao City dugay nang gihuptan sa pamilyang Durano, ug karon si Mayor Ramonito Durano ang nagdumala.
Kon imong paminawon ang mga yangongo sa mga katawhan makaingon gyud sila nga nauwahi sa kalamboan isip siyudad.
Kay karon lang mibarug ang mga mall ug uban pang establisemento.
Dunay nakahonghong kanako nga kanunay tigsunod sa atong kolum dinhi sa Superbalita Cebu.
Nga matod pa, tinood ba nga nahimugso ang FB page kay nahulga ang liderato sa mga Durano, nga lahi na unya ang motumaw nga apelyedo nga maoy mahimong mayor?
Kini human napukan ang pagdumala sa mga Durano sud sa 70 ka tuig nga pagdumala sa quinto distrito.
Gibutang si Kongresista Duke Frasco sa katawhan sa among distrito aron maoy tinud-anay nga makapalambo ug motubag sa panginahanglan sa katawhan nga way gipili.
Modayeg man sab ko sa mga maayong nahimo sa mga Durano. Dungan sa panghinaot nga ang nahitabo kanako kaniadto nga giti-unan og armas pinaagi sa pagpangharas sa ilang mga batabata di mahitabo ngadto sa yanong mga tawo. (Email: efrenlonzon71@gmail.com Text:09235562777)