PAMPANGA

Garcia: Dake ning aldo at bengi, patingapun at kabukas (Parts of the day and the night, whole day and overnight)

Kapisik



KING tawling aldo ning dimla, agaganaka da ka;

Ding taliri mu gagapang la anting araru king lawta;

Pipalutang daya...ing are mengarapug na.

A, ring bini ring katilpu ila namang lungkas

at ding biga manikal la...

Lwa ning gugupung panaun karing banwa tumulas na;

Dapot bayu pa malyari iti, mangaskad pamu ing laput at burak.

Bang sulagpo king mamala at magpalwa

karing sablang matang alang sangkan king pamanangis da.

Anting sangkan ding kanaku,

e anting sangkan ding ulu o sibuyas karing mata

nung e sangkan ning mebuguk a panandam

inyang tawling mikit kata

karing tawling penandit

ning tawling bengi

king tawling aldo ning dimla...

tawling penandit king tawling bengi

king tawling aldo ning tawling bye ku.

Pasibayu, atin na namang dayang daragus

karing bayung yamut ku!

~ Miguel Serrano, “Tawling Aldo ning Dimla,” 11.02.04

***

Galingaldo o ganinglado karing aliwa. Ya pin ing pilatan ning bengi at ning panyatang ning abak. Madalumdum ya pa at deng tau keraklan mamanudtud la Pang kasalungsungan subali mu kareng manggagatas o magpapandesal at ding magobra keng marayung luluslus maranun bang e la mitawli. Deng pari at ding sakristan galingaldo la naman alus mibabangun.

Munag. Deng tandang tutulauk na la. “Masaspak ne ing aldo” ngara deng mangatwa. Kanini ya magumpisang sumilip ing aldo at ding kayang aslag gugulis la karing biga at king salu ning banwa antimong gugulisak a daratang ne ing bayung aldo. Deng ayup mamanyulagpo na la bang makapanima lang kanan da lele ilug, sapa o dayat malat.

Abak. Ini ing makaslag neng ganap ing aldo at kuleneng gintung maslag. Deng tau mamandilu na la at maglutu na lang apangan ding indu at ding ibpang manasan lalaut na la bang magligo karing sapa, ilug plasdan o baklaran king dagat o laut o manasik na la karing marangle o taldawa ding ortelanu. Deng talapagaral mamaglub na la.

Matas ne ing Aldo. Kanini la keraklan mamalengki ring indu bang atin lang ilutu para paugtwan at apunan. Piyagnan da na. Deng aliwa mamipi la, manyable o mamalantsang imalan da ring pamilya da.

Ugtungaldo. Kaylangan magdala kang payung o turung bang e ka mibilad keng pali ning aldo. Makatuling na. Makasakit pa. Mayap karing manyable pipipyan at magbilad nanu mang pamangan a sukat mibilad. Ing pale bayung dara bibilad da na keng dalan.

Ugtu o ugtung aldo. Mibubwa na ing nasing tinun nang ima at deng tau mu naman mipapawas nala keng lisangan. Kanini la mamangan paugtwan deng pamilya o agya mang deng magdili-dili. Kapalyan-palyang dake ning patingapun.

Gatpanapun. Manyaman paynawang ibat mengan. Makatundu ing labul ning angina at ing tigtigan mu naman a maralas patigtig da keng radyu pane tumaylaat dalit ning pamalsinta. Malyari kang maninap matudtud o makagising man. Deng anak masakit lang patudturan kanini.

Palbug Aldo. Dirimla na. Manyaman magpatingangin keng marangle o lele ilug o dagat kabang ing aldo palbug ne. Mekayuli no reng magaral at magobra. Mamanuli no reng ayup manibat lele dagat karing santungan da.

Sisilim. Limbug ne ing aldo inya madaladalumdum na. Malutu ya ing banwa keraklan at tigtigan da ne king kumpana ing pangading bengi o orasyun.

Bengi. Laganas na ing dalumdum at keraklan kareng tau mamanuli na la o ati no bale da bang mapun o mangan para king bengi.

Bayung Bengi. Magpatiktik no ring tau king nanu mang gagawan da bang mangading pasalamat para king patingapun. Mamanudtud na la.

Kapitangan Bengi. Malakak no reng tau at mamaninap na la keng lalam ning tudtud da uling malalam na ing bengi.

***

Dake Talabaldugan:

iral¹ – (palagyu) pamaniral, pamag-ari, pamandatila, kapalyaryan, pangapalyari. English: prevalence. Alimbawa king pamangamit: ““Ing iral ning katutwan e na malyaring takpan ning kapamiraytan at kalaraman.”

iral² – (palagyu) kairalan, katunayan, katutwan. English: actuality. Alimbawa king pamangamit: “Mangibabo pa mu rin ing iral ning pali agyang alang patugut ing patak ning uran.”

iral³ – (palagyu) kasalukuyang magagamit, kalakaran, bayung bage abuburi ding keraklan. English: prevalence. Alimbawa king pamangamit: “Iral ing makabang bwak at bakukak ngening panaung iti at akit mu nung makananu ing buri ding tau nung sanu ing lakwas marakal.”

iral – (palagyu) pamangibabo, pamanaig. English: predominance. Alimbawa king pamangamit: “Alang makasaul keng iral ning sala ning aldo agyang kata-kata la pang bulan.”

irap¹ – (palagyu) talapanglwalu ding mata bang e la miluban nanu mang dinat. English: eyelash. Alimbawa king pamangamit: “E la mu pampalagu deng irap nung e sasaup la naman kareng mata tamu bang e la mapuling.”

***

GAWING MEKALINGWAN KARING KAPAMPANGAN!

Sadya magagamit yang anting panatung pambengi kaybat na ning Pangading Sisilim o Orasyun ing “Ben’Dis’pu” o Bengi ning Dyos pu” karing misasaganang memalen. E ya man “mayap a bengi” uling ini menibat ya karing dayung sinakup kekatamu—ding Kastila at Amerikanu a katumbas ning “Buenas noches” o “Good evening” karela.

Lakwas ne mang mayap ing “Ben’Dis’pu” uling agaganaka de reng sasambitla kaniti ing Apung Ginu. Sayang, e ne magagamit alus kareng kabalen tamu ing panatung pambenging ini agya mang ing “dispu” yang pakibat da reng mipanatung maki kagalangan lalu na kareng mibalayi o mipumpari/mikumari.

***

PAMIPALINO: Ing Kapisik magnasa ya at manwalang misubling pasibayu ing lagablab ning legwan ning Kalinangan Kapampangan kapamilatan ding keyang dalit, kawatasan, amlat at miyayaliwang kapaglalangan-panyulat a misulat king pigmulan at tune kulitan kambe ning dalise at mapagmasabal a pamisip at parasan.

Ing panyulat ding pipumpunan yang sukat mataluki at miparangalan kapamilatan ning pamangamit kareti at aliwa ring karing dayu at salungat a paralan dang dela keti Kapampangan. Ing Kapisik ala yang kikilingan a kapanaligan, aguman o ninu man nung e ing Lubusang Katutwan.

Malyaring sumulat king garciakragi@yahoo.com para karing kutang o munikala.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph