NAPILO na sab ang laing katuigan. Sa pag-aginod sa panahon, luyo sa mga kabag-uhan sa natad sa journalism, pabiling lig-on, taliwala sa mga hagit ang Superbalita Davao.
Karong adlawa, 20-anyos na ang giila nga unang inadlaw nga mantalaang bisaya sa habagatang Mindanao.
Sa matag karon ug unya, nahimong kabahin ang Superbalita sa inadlaw-adlaw nga dagan sa kinabuhi sa atong mga suki, inubanan paghatag og balita, kalingawan nga giingong swak sa tibuok pamilya.
Sa ka-advance karon sa teknolohiya sa pagbalita, miapas sab ang Superbalita Davao.
Luyo sa pagsuwat sa mantalaan, gihingusgan na sab ang social media campaign, diin mga videos nga informative ug makalingaw ang gihimo alang sa mga suki.
Tuod man, di sayon ang hagit sa kompetisyon, apan ang Superbalita, makanunayong maikagon sa pagserbisyo sa atong mga suki, sa nagkadaiyang suok sa rehiyon, lakip na online.
“Gikan sa buhatan sa DSWD, kami madasigong nanghinaot nga makaangkon og labaw pa sa 100 years ang SunStar Superbalita. Hugot ang among pagsalig nga ang Superbalita kanunay ug matinud-anong nag-alagad tungod ug alang sa mga kaigsoonang nanginahanglan,” ni DSWD-Davao Region Director Mercedita P. Jabagat.
"Ganahan gyud kaayo ko mobasa sa Superbalita, especially sa headline kay lingaw kaayo. Makalingaw sab ng mga blind item. Padayan sa paglambo Super B. Happy 20th anniversary,” ni Frankie Juanitas-Lazarito.
"Pinaka-ganahan gyod nako sa Superbalitadavao is ang balita mismo sa pang-adlaw-adlaw nga panghitabo sa Davao, especially nako nga dinhi na gapuyo sa Cebu. Importante kaayo nako nga makahibaw pod sa updates sa current situations sa Davao, negative man or positive. Dako og tabang ang impormasyon nga inyung nahatag sa dakbayan kay bisan sa mga lagyong lugar, naay dabawenyo, makahibaw sa panghitabo," matud ni Archibald Goc-ong III.
"Ganahan ko mobasa (online/Facebook) sa Superbalita kay maskin naa ko dri sa Sugbo, updated gihapon ko sa mga panghitabo sa Dabaw. Lingaw pa jud ang pagkasulat. Great job, Superbalita,” ni Paul Zamora.
"Sobra pa sa basa (Superbalita). Source namo na sa balita. Dili na gani nako gi-edit. As is na kung unsa ninyo pagsulat. Girecognize baya ang source ha ug ang writer pa jud," ni Lilet Salo, radio broadcaster.
"Congratulations to Superbalita Davao. Thank you for the continued support for the programs of the Social Security System (SSS). You have been a great factor in the information dissemination and Education of our members. May you continue to be a great partner not only to us but the government in general," ni Greta Fe Quayle, public information officer SSS-Davao.
"Ang SunStar Superbalita hitik sa balita ug impormasyon nga dapat masayran sa katawhan. Aduna pud kini mga kalingawan so dili siya boring basahon kay ginasiguro sa mga editors niini nga aduna kini the right mix of serious news and fun section. Ang mga kolumnista usab, nagagiya gyud sa sakto nga ang mga mobasa makaform sa ilang mga kuro-kuro ug desisyon. Ganahan sad ko anang nga tubag alang sa SSS, sa Pag-ibig ug Philhealth kay dakong tabang sa katawhan. Congratulations SuperBalita sa inyong ika-20th anniversary. Ipadayon ang pagserbisyo sa publiko isip legitimate source sa saktong impormasyon," Sherwin Manual, chief of staff, Office of Councilor Javi Campos.
"Happy 20th anniversary Superbalita akoang wish ka ninyo more balita nga kanunay mahimong updated ang mga katawhan ug positibo nga panlantaw sa sumusunod nga panahon. And God will bless your company and being a media please spread also the good news and word of God," ni Ruben Gonzaga.
"Nahimo akong kabahin sa Superbalita sud sa upat ka tuig gikan 2006 hangtud 2010. Ang Superbalita uban ang kinatibuk-ang pwersa sa Sunstar Davao, wa lamang misilbi isip lugar nga trabahoan apan usab nahimong sama sa ikaduhang pamilya. Ang mga pagtulun-an ug kaalam, nagpabilin sa akoang huna-huna ug kasing-kasing. Special shoutout sa amoang pinalangga nga anhing managing editor nga si Ely Luciano nga nagsilbi sad nakong amahan sa media. Bisan asa man ko dalhon sa kapalaran, pabilin akoang mapasigarbohon nga nahimo kong kabahin sa Superbalita Davao sa 20 ka tuig niining pagserbisyo sa katawhan. More power Superbalita. I love you all. God bless,” ni July Aubrey Revilla-Ngo, kanhi reporter sa Superbalita Davao.
"Ganahan ko sa tanan nga napatik sa Superbalita walay pili tungod kay diha tanan impormasyon mahibaloan dili lang lokal nga balita adunay national, international, adunay mga komedi. Kumpletos rekados na tanan busa ganahan ko. Happy happy 20th anniversary Superbalita Davao," ni Trexie Dots Harmony.
"Tanan ninyong balita sa mantalaan 100.1 percent satisfied kaayo mi. Labina sa akong pamilya nga number one, die hard kaayo mi mopalit ug mobasa sa inyuhang mantalaan (Superbalita Davao). Daghan kaayong salamat sa pagpaabot ninyo sa mga nindot nga mga balita sa katawhan dinhi sa siyudad sa Davao. Mabuhay, more power ug happy anniversary,” ni Tata Omar Gonzaga Nayre.
"Congratulations po on your 20th year anniversary. Thank you for the long-lasting service to inform people of current news today,” ni Jayrah Kaye Adeva, singer-composer.
"On behalf of PhilHealth Davao Region, congratulations sa Superbalita alang sa ilahang 20th anniversary. Gusto mi magpasalamat sa suporta ug partnership sa mga nilabay na tuig alang sa paghatod ug impormasyon alang sa atong miyembro. Padayon sa inyong maayong pag-serbisyo ug more years pa alang sa inyoha," ni Kleah Gayle D. Guevara, PRO III, Philhealth Davao Region.