SECTIONS
Sunday, September 15, 2019
SUPERBALITA DAVAO

Superbalita ninunot sa 'digital' nga panahon

MAORA og kagahapon lang nahimugso ang SunStar Superbalita Davao tungod sa kapaspas sa pagligid sa mga katuigan.

Tungod kay nakatutok ang mantalaan sa pag-alagad sa katawhan, halos wala na mamatikdi nga sa takulahaw lang 20 anyos na diay kini karong adlawa.

Ang Superbalita nahimugso niadtong Hulyo 24, 1999.

Daghan nang naagian nga mga hagit sa operasyon, apan pabilin gihapon kining nibarog aron nga padayon nga makaalagad pinaagi sa pagpadangat og tinuod, mapuslan ug makalingaw nga mga balita, di lang dinhi sa siyudad sa Davao apan lakip na sa kasikbit nga mga siyudad ug probinsiya sa habagatang Mindanao.

Kining tanan nahitabo tungod sa mga tawong nahimong kabahin ug dunay dakong papel nga gihuptan aron nga moabot ang Superbalita ning panahon, bisan sa kamatuoran nga wala na sila sa mantalaan sama nila Tony Ajero, Ely Luciano, Stella Estremera, Alger Dura ug daghan pang uban.

Apan atong tin-awon nga ang Superbalita wala nagpabilin sa kagahapon. Sa pagpanglabay sa panahon, hinay-hinay sab nga nikambyo ug nagsagop og mga bag-ong inobasyon nunot sa pag-uswag sa kapanahonan, ilabi na karon nga "digital" na ang kalibutan.

Kaniadto mangalap og mga balita nga halos tibuok adlaw. Kini gumikan kay ang magsusuwat kinahanglan nga personal nga mobiyahe ug mangatubang ug mohinabi og mga tawo. O kaha kinahanglan niyang mosulod og mga buhatan, pribado man o publiko, aron nga makakuha og mga nindot nga balita. Ug tungod niini, kinahanglan nga mo-hire og daghang personahe aron sa paghimo sa gimbuhaton.

Ang matang sa trabaho sa manunulat mano-mano ug kinahanglan nga mogugol og dakong panahon alang niini.

Ang kakuwang sa kagamitan nakapasamot sa kadugay sa paggawas sa mantalaan kay moagi pa og daghang proseso nga mano-mano sab.

Apan karon lahi na ang gisagop nga pamaagi sa Superbalita gumikan kay ninunot kini sa makabag-ong kagamitan, ilabi na kon teknolohiya ang hisgutan.

Duna na kitay mga digital nga camera ug kahimanan alang sa pagkuha og mga hulagway. Gawas sa mga camera, nakabaton na kita og "drone" nga makamaniobra og kuha og hulagway sa taas nga bahin nga di na kinahanglan nga mosaka og mga balay o kahoy aron pagkuha og ensakto ug aktuwal nga panghitabo sa ubos nga bahin.

Ang Superbalita nagsagop na sab sa social media sama sa Facebook ug uban pa aron nga mas dali nga mapahibawo ang mga balita ngadto sa katawhan bisan asang suok ning kalibutan.

Samtang ang atong mga makina sa pang-printa, mga digital na sab. Duna kitay web printing machine nga moprinta og liboan ka mantalaan sud lang sa hamubong panahon. Ug di na angay nga daghang mga kamot ang mohagpat og usa-usa sa mga pahina, kay sa paggawas sa makina, han-ay na ang tibuok mantalaan subay sa iyang mga pahina. Hinungdan kon kaniadto mabuntagan ang printa sa mantalaan, karon puwede nang makabasa ang katawhan bisan pa og alas 12 pa lang sa tungang gabii.

Busa ang mantalaan wala na magkinahanglan og daghang personahe aron nga mahimo ang operasyon sa matag adlaw.

Ingon na niini ang naabot sa Superbalita karong panahona. Wala magpaulahi sa urog sa panahon, inay ninunot sa dagan sa panahon aron padayon nga makatubag ug makaalagad ngadto sa katawhan.

Mapasalamaton ang Superbalita sa way puas nga suporta gikan sa tagdumala, ilabi na kang Ma'am Gina G. Atienza, presidente sa SunStar Davao Publishing, Inc., Ma'am Tessie B. Alcoriza, general manager ug ang kasamtangang editor in chief, Reuel John F. Lumawag.

Apan di sab namo kalimtan sa pagpasalamat ang die hard nga mga suking tigbasa nga nahimo nang kabahin ug inspirasyon aron padayon kaming magkugi ug maningkamot alang sa pagtunol og mga mahinungdanong impormasyon, apil na sab ang paglingaw kaninyo.

Kanatong tanan, happy 20th anniversary!


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph