CEBU. Patay ang usa ka lalaki nga nagmaneho og motorsiklo human kini nibangga sa usa ka delivery truck sa Barangay Lutac, Dakbayan sa Naga. (Tampo nga hulagway)
CEBU. Patay ang usa ka lalaki nga nagmaneho og motorsiklo human kini nibangga sa usa ka delivery truck sa Barangay Lutac, Dakbayan sa Naga. (Tampo nga hulagway)

Drayber sa motor patay human mi-overtake

DILI magpataka og overtake ug siguruon ang kaluwasan, kini ang subli nga pahimangno sa kapulisan sa mga motorista.

Patay ang usa ka lalaki nga nagmaneho og motorsiklo human kini nibangga sa usa ka delivery truck diha sa iyang pag-overtake sa usa ka dumptruck sa may Barangay Lutac, Dakbayan sa Naga.

Ang biktima giila nga si Ruel Tabali, hingkod ang panuigon, taga Barangay Uling sa maong syudad.

Nahitabo ang aksidente alas 9:30 sa buntag, Miyerkules Hulyo 24, 2019.

Gideklarar nga patay si Tabali sa dihang gidala kini sa tambalanan sa Dakbayan sa Naga, tungod sa mga naangkon nga head injuries.

Matud sa kapulisan sa Naga City Police Station, si Tabali padulong sa Dakbayan sa Naga sa dihang nabangga niini ang delivery truck nga padung sa Dakbayan sa Toledo.

Ang delivery truck gimaneho ni Ragebell Pingkian, 21, taga lungsod sa Consolacion.

Matud ni Lieutenant Colonel Jason Villamater, hepe sa Naga Police Station, nga base sa pakisusi sa kapulisan, ni-overtake unta si Tabali sa usa ka dumptruck.

Giingon nga kusog usab ang padagan niini.

Hinungdan nga niabot kini sa pikas lane ug mao'0y rason nga nagka-head-on collision sila sa delivery truck.

Subli nga awhag ni Villamater sa mga motorista, magmatngon diha sa pagmaneho ug dili magpataka og overtake, ilabi na sa mga parte sa dalan nga likuon, samot na sa mga blind curve. (Superbalita Cebu)

Related Stories

No stories found.
SunStar Publishing Inc.
www.sunstar.com.ph