NADUGANGAN na sab ang mga magduduwa sa National Basketball Association (NBA) nga ming-atras sa ilang partisipasyon sa Team USA alang sa kampanya niini sa FIBA Basketball World Cup nga sugdan karong Agusto 31 sa China.
Sila si Portland Trail Blazers guard Damian Lillard ug San Antonio Spurs guard DeMar DeRozan mao ang labing ulahing mga magduduwa nga ning-atras sa ilang pagkaapil sa Team USA.
Sa kinatibuk-an, ning-abot na sa walo ka mga magduduwa ang ningbuhat niini.
Sa ming-agi lang adlaw, ning-atras na sila si Philadelphia 76ers forward Tobias Harris ug Washington Wizards guard Bradley Beal sunod nila ni Los Angeles Lakers forward Anthony Davis, Trail Blazers guard CJ McCollum ug Houston Rockets guards James Harden ug Eric Gordon.
Si Lillard, 29, kinsa usa ka four-time All-Star, nag-average og 25.8 puntos ug career-high 6.9 assists sa miaging season.
Si DeRozan, 29, kinsa usa sab ka four-time All-Star, nag-average og 21.2 puntos ug 6.0 rebounds.
Aron hinayhinayan og tapak ang haw-ang nga gibiyaan sa mga ning-atras nga mga magduduwa, ang Team USA ningkuha nila ni Jaylen Brown sa Boston Celtics ug Julius Randle sa New York Knicks. (Reuters, ESL)