Sugilanon: Mga awit ni Tatay Inting

sugilanon072519
sugilanon072519

SABADO, alas kuwatro sa kaadlawon. Andam na si Rudy ug ang iyang kapikas nga si Mira. Kuhaon silag sakyanan nga Nissan Urvan sa ilang umagad nga si Jezreel. Moadto sila sa Badian kay imbitado sa ‘birthday’ ni Denver, kinamanghurang igsuon ni Rudy. Alas tres pa gani kaganina mibangon na si Rudy. Naligo siya. Pagka alas tres i-medya si Mira na sab ang naligo. Alas singko ang saad ni Jezreel nga kuhaon sila sa ilang balay sa Baring, Carmen. Tua sa Poblasyon ang balay nilang Jezreel ug Sheena, iyang kapikas, nga anak nilang Rudy ug Mira.

Aron pagpalabay sa oras mitukar sa piyano si Rudy diha sa ilang sala. Si Mira nalingaw og tan-aw sa ‘facebook’ sa iyang ‘tablet.’ Mga awit Binisaya ang gitugtog ni Rudy sa piyano. Piano solo ang iyang pagtukar sa paboritong mga awit ni anhing Tatay Inting. Walo na ka tuig ang milabay sukad sa iyang pagtaliwan. Amahan siya ni Mira.

Wa kapugngi ni Mira nga bation og kamingaw sa iyang amahan. Puro lang hudyaka ug katawa ang mahinumdoman niya sa iyang amahan, kay komedyante kaayo kini. Daghang balak, mga awit nga Binisaya, Kinatsila, Tagalog, Iningles ug Hinapon, apan ang gitugtog ni Rudy mga Binisaya, sama sa Ang Palad Nagbuot, Luyo sa Dag-um, Kamingaw sa Payag, Inday, Daplin sa Baybayon, Ipangutana sa Bulan, ug Hinginli ang mga Bituon. Daghan sab siyag sugilanon nga kataw-anan. Tapuk-an god siyag mga tawo sa garahean sa ambulansiya kaniadto sa wa pa siya mo-retiro sa pagka drayber.

Mitulo ang mga luha ni Mira. Misulod siyag dali sa CR aron mamahid, aron di makamatikod si Rudy nga natandog siya sa mga sonata nga nakapahinumdom niya sa iyang amahan. Sa buhi pa si tatay Inting niya, hapit kada Sabado ug Dominggo nga magpaduyog si Tatay Inting kang Rudy sulod sa 20 anyos nga naumagad niini si Rudy. Sikit ra ilang mga balay sa ilang barangay.

Paghigawas ni Mira sa CR nasiklapan niya si Rudy nga nagpiyong samtang nagtukar. Misamot kananoy ang mga nota nga namugna sa mga tekla sa piyano. Bisan sa kabisi ni Rudy sa trabaho (kay abogado man siya), magdala gani siyag papeles nga trabahuonon sa balay, makalugar gihapon siya pagtukar sa piyano kon mag-brown out. Sip-unon siya ug manghupaw kon magtugtog sa mga awit ni Tatay Inting. Dayon manarapo sa nawong ginamit ang panyo. “Mingawon sab tingali siyang Tatay!” tuaw ni Mira sa hilom.

HONK! Honk! Honk! Nadungog nilang Rudy ug Mira ang busina sa Nissan Urvan gikan sa gawas sa ilang balay, daplin sa karsada. Midali-dali si Rudy pagtrapo sa iyang nawong ginamit ang iyang panyo. Nanikma siya. Namula ang mga mata.

“Mora mag subo imong hitsura!” komento ni Mira.

“Mingawon sab bitaw ko kang Tatay Inting,” angkon ni Rudy nga nalaghaw ang tingog. Ug gibitbit niya ang ilang mga dad-unon.

“Labi pa ko!” ni Mira nga mi-abrasiyete kang Rudy. Unya nagpahiyumay silag masulub-ong mga pahiyom. (KATAPUSAN)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph